၉. စန္ဒိမသုတ္တဝဏ္ဏနာ

၉၀. ဝိမာနေ ဂဟိတေ တံနိဝါသီပိ ဂဟိတော ဟောတီတိ ဝုတ္တံ ‘‘စန္ဒဝိမာနဝါသီ ဒေဝပုတ္တော’’တိ. သဗ္ဗဓီတိ သဗ္ဗသ္မာ ဒုဂ္ဂဋ္ဌာနာ ဝိပ္ပမုတ္တောသိ ဘဂဝါ တွံ၊ တသ္မာ မယှမ္ပိ ဣတော သမ္ဗာဓဋ္ဌာနတော ဝိပ္ပမောက္ခံ ကရောဟီတိ အဓိပ္ပါယော. တေနာဟ ‘‘တဿ မေ သရဏံ ဘဝါ’’တိ. လောကာနုကမ္ပကာတိ သဗ္ဗဿ လောကဿ အနုဂ္ဂဟာ၊ တသ္မာ တုယှမ္ပိ ဧတဿပိ စန္ဒဿ. တာဒိသာ ဧဝါတိ သမာနာ ဧဝ. ပမုဉ္စသီတိ ပမုဉ္စိတ္ထ. တေနာဟ ‘‘အတီတတ္ထေ ဝတ္တမာနဝစန’’န္တိ.

စန္ဒိမသုတ္တဝဏ္ဏနာ နိဋ္ဌိတာ.