၂. ဒုတိယကဿပသုတ္တဝဏ္ဏနာ

၈၃. ဒွီဟိ ဈာနေဟီတိ အာရမ္မဏလက္ခဏူပနိဇ္ဈာနလက္ခဏေဟိ ဒွီဟိ ဈာနေဟိ. ကမ္မဋ္ဌာနဝိမုတ္တိယာတိ ကမ္မဋ္ဌာနာနုယောဂလဒ္ဓါယ ဝိမုတ္တိယာ. တေန တဒင်္ဂဝိက္ခမ္ဘနဝိမုတ္တိယော ဝဒတိ. သတ္ထုသာသနဿ ဟဒယတ္တာ အဗ္ဘန္တရတ္တာ ဟဒယဿ မာနသဿ၊ အနုပတ္တိံ ပဋိလာဘမာနသံ. တံ ပန အတ္ထတော အညာ ဧဝါတိ အာဟ ‘‘အရဟတ္တ’’န္တိ. တံ ပတ္တုကာမေန ဧကန္တတော ဝဇ္ဇေတဗ္ဗတဏှာဒိဋ္ဌီနံ ဘာဝေ တဿ အနိဇ္ဈနတော၊ တဒဘာဝေ ဣဇ္ဈနတော စ တေ ဥပ္ပါဒနဝသေန ယဒဂ္ဂေန နိဿိတော၊ တဒဂ္ဂေန ပနာယမ္ပိ တေဟိ နိဿိတော နာမ ဟောတီတိ အာဟ ‘‘အနိဿိတော’’တိအာဒိ. အရဟတ္တံ အာနိသံသိတဗ္ဗဋ္ဌေန အာနိသံသံ ဧတဿာတိ အရဟတ္တာနိသံသော. အရဟတ္တံ ပတ္တုကာမဿ ပုဗ္ဗဘာဂပဋိပဒါ ဣစ္ဆိတဗ္ဗာ. တတ္ထ စ သဗ္ဗပဌမော ကမ္မဋ္ဌာနအတ္တာနုယောဂေါ၊ သော ဣဓ န ဂဟိတောတိ အာဟ ‘‘တန္တိဓမ္မော ပုဗ္ဗဘာဂေါ’’တိ. တတ္ထ တန္တိဓမ္မောတိ ပရိယတ္တိဓမ္မော.

ဒုတိယကဿပသုတ္တဝဏ္ဏနာ နိဋ္ဌိတာ.