၅. အက္ကောဓသုတ္တဝဏ္ဏနာ

၂၇၁. ကောဓော တုမှေ မာ အဘိဘဝီတိ ဧတ္ထ ကောဓေန အနဘိဘဝနီယတ္တံ ခန္တိမေတ္တာကရုဏာဒိတပ္ပဋိပက္ခဓမ္မပရိဗြူဟနေန. တထာ ဟိ တံသမင်္ဂိနော ကောဓော အဘိဘုယျတီတိ အာဟ ‘‘တုမှေဝ ကောဓံ အဘိဘဝထ. ကုဇ္ဈန္တာနံ မာ ပဋိကုဇ္ဈိတ္ထာ’’တိ. ပဋိပဒါတိ ဧသာ ပဋိပတ္တိ. မေတ္တာတိ အပ္ပနာပ္ပတ္တာ မေတ္တာ. တဒုပစာရော မေတ္တာပုဗ္ဗဘာဂေါ. န ဝိဟိံသတိ ကိဉ္စိ ဧတာယာတိ အဝိဟိံသာ. ကရုဏာတိ အပ္ပနာပ္ပတ္တကရုဏာ ဝေဒိတဗ္ဗာ. တဒုပစာရော ကရုဏာပုဗ္ဗဘာဂေါ. လာမကဇနန္တိ ခန္တိအာဒီသု ယောနိသောမနသိကာရာဘာဝေန ဂါရယှသမာစာရသမာယောဂေန စ နိဟီနံ ဇနံ. ပစ္စယပရိသုဒ္ဓိယာ ကောဓော အဘိမဒ္ဒမာနော ပုဂ္ဂလံ အဘိမဒ္ဒတိ၊ တဿ သော ပဋိသင်္ခါနဘာဝနာဗလေဟိ သမ္မဒေဝ ပဟာတဗ္ဗောတိ.

အက္ကောဓသုတ္တဝဏ္ဏနာ နိဋ္ဌိတာ.

တတိယဝဂ္ဂဝဏ္ဏနာ နိဋ္ဌိတာ.

သာရတ္ထပ္ပကာသိနိယာ သံယုတ္တနိကာယ-အဋ္ဌကထာယ

သက္ကသံယုတ္တဝဏ္ဏနာယ လီနတ္ထပ္ပကာသနာ သမတ္တာ.

နိဋ္ဌိတာ စ သာရတ္ထပ္ပကာသိနိယာ

သံယုတ္တနိကာယ-အဋ္ဌကထာယ သဂါထာဝဂ္ဂဝဏ္ဏနာ.

ပဌမော ဘာဂေါ နိဋ္ဌိတော.