၄. အစ္စယသုတ္တဝဏ္ဏနာ

၂၇၀. သမ္ပယောဇေသုန္တိ အညမညံ ဝါစသိကံ ဖရုသံ ပယောဇေသုံ. တေနာဟ ‘‘ကလဟံ အကံသူ’’တိ၊ ဝိဝါဒံ အကံသူတိ အတ္ထော. အတိက္ကမ္မဝစနန္တိ ဝစီသံဝရံ အတိက္ကမိတွာ ဝစနံ. ယသ္မာ အစ္စယေ ဒေသိယမာနေ တံ ခီဏယတိ အညမညဿ ခမမာနဿ ခမနံ ပဋိဂ္ဂဏှတော၊ တသ္မာ ဝုတ္တံ ‘‘နပ္ပဋိဂဏှာတီတိ န ခမတီ’’တိ. တုမှာကံ ဝသေ ဝတ္တတု၊ ဝိသေဝိတံ အကတွာ ယထာကာမကရဏီယော ဟောတု. မိတ္တဓမ္မော ဣဓ ဥတ္တရပဒလောပေန ‘‘မိတ္တော’’တိ ဝုတ္တောတိ အာဟ ‘‘မိတ္တဓမ္မေ’’တိ. ကရဏဝစနန္တိ ‘‘မိတ္တေဟီ’’တိ ကရဏဝစနံ ဘုမ္မတ္ထေ. တေနာဟ ‘‘မိတ္တေသူ’’တိ. ယထာ နိဗ္ဗတ္တသဘာဝဿ ဘာဝတော အညထတ္တံ ဇရာ၊ ဧဝံ မိတ္တဘာဝတော ဝုတ္တဝိပရိယာယော အမိတ္တဓမ္မော ဇရာပရိယာယေန ဝုတ္တော. အဂါရယှံ အနဝဇ္ဇံ သဗ္ဗသော ပဟီနကိလေသံ. တေနာဟ ‘‘ခီဏာသဝပုဂ္ဂလ’’န္တိ.

အစ္စယသုတ္တဝဏ္ဏနာ နိဋ္ဌိတာ.