၆. ယဇမာနသုတ္တဝဏ္ဏနာ

၂၆၂. ယဇန္တာနန္တိ ဒက္ခိဏေယျံ ဥဒ္ဒိဿ ဒေန္တာနံ. အဋ္ဌုပ္ပတ္တိကော သုတ္တနိက္ခေပေါတိ ဒဿေတွာ အတ္ထဝဏ္ဏနံ ကာတုံ ‘‘တဒါ ကိရာ’’တိအာဒိ ဝုတ္တံ. အဂ္ဂန္တိ သေဋ္ဌံ. တေဟိ တေဟိ ဝါ ယထာလဒ္ဓသပ္ပိအာဒယော မာ နဿန္တု၊ အဂ္ဂဘာဝေန ဂဟိတာနိ သပ္ပိအာဒီနိ ကေဝလံ အဂ္ဂိမှိ ဈာပနေန၊ ဒေဝါ မနုဿာ မိစ္ဆာဂါဟေန မာ နဿန္တု. တက္ကေနာတိ တက္ကမတ္တေန. ‘‘ကထေမာ’’တိ အမှေ မညထ၊ ဣဒါနိ ပဿထ၊ ပစ္စက္ခတော အယံ ဝေါ။ပေ။ အာဂစ္ဆတီတိ အာဟံသူတိ ယောဇနာ.

ဥပဓိဝိပါကန္တိ ဥပဓီသု ဝါ ဝိပစ္စတိ၊ ဥပဓယော ဝါ ဝိပါကာ ဧတဿာတိ ဥပဓိဝိပါကံ. ဝိပ္ဖါရဝန္တံ ဟောတိ ဝိပုလပက္ခတာယ. ဘိက္ခုသံဃဿ အဒံသု ‘‘သမ္မာသမ္ဗုဒ္ဓေန မဟာဗြဟ္မုနာ စ ဧဝံ ဩဝါဒေါ ဒိန္နော’’တိ.

ယဇမာနသုတ္တဝဏ္ဏနာ နိဋ္ဌိတာ.