၁၀. သမုဒ္ဒကသုတ္တဝဏ္ဏနာ

၂၅၆. စက္ကဝါဠမဟာသမုဒ္ဒပိဋ္ဌိယန္တိ စက္ကဝါဠပဗ္ဗတပါဒသမန္တာ မဟာသမုဒ္ဒတီရပိဋ္ဌိယံ. ယထေဝ သိနေရုသမီပေ မဟာသမုဒ္ဒေါ အနုပုဗ္ဗနိန္နော အနုပုဗ္ဗပေါဏော အနုပုဗ္ဗပဗ္ဘာရော၊ ဧဝံ ယေဘုယျေန စက္ကဝါဠပါဒသမီပေပိ. တေနာဟ ‘‘ရဇတပဋ္ဋဝဏ္ဏေ ဝါလုကပုလိနေ’’တိ. ဝုတ္တပ္ပကာရာသူတိ အနန္တရသုတ္တေ ဝုတ္တပ္ပကာရာသု. အဿမပဒေနာတိ အဿမပဒဝေမဇ္ဈေန. ဧဝံ စိန္တယိံသူတိ ‘‘ယံ နူန မယ’’န္တိအာဒိနာ ယထာ ပါဠိယံ အာဂတံ၊ ဧဝံ မန္တယိံသု.

ဣစ္ဆိတကရောတိ ယဒိစ္ဆိတကရဏံ. ဒုဋ္ဌာနန္တိ ဒုရာသယာနံ. တေ ပန ဒုဋ္ဌဇ္ဈာသယာ ဝိရုဒ္ဓါ ဟောန္တီတိ အာဟ ‘‘ဒုဋ္ဌာနံ ဝိရုဒ္ဓါန’’န္တိ. ပဝုတ္တန္တိ ဗီဇံ သန္ဓာယ ဝပိတံ. တေနာဟ ‘‘ခေတ္တေ ပတိဋ္ဌာပိတ’’န္တိ.

သာယမာသဘတ္တန္တိ သာယံ အသိတဗ္ဗဘောဇနံ. ယထာဝါရံ ဘက္ခိတမေတံ ဒေဝါနံ ဝိယ သုခုမံ ဂုရုဝါသဉ္စ န ဟောတီတိ ‘‘ဘတ္တ’’န္တိ ဝုတ္တံ. ဂေလညဇာတန္တိ သဉ္ဇာတဂေလညံ. ဝေပတီတိ ကမ္ပတိ ပဝေဓတိ.

သမုဒ္ဒကသုတ္တဝဏ္ဏနာ နိဋ္ဌိတာ.

ပဌမဝဂ္ဂဝဏ္ဏနာ နိဋ္ဌိတာ.