၁. ဆေတွာသုတ္တဝဏ္ဏနာ

၇၁. ဝဓိတွာတိ ဟန္တွာ ဝိနာသေတွာ. အပရိဒယှမာနတ္တာတိ အပီဠိယမာနတ္တာ. ဝိနဋ္ဌဒေါမနဿတ္တာ န သောစတိ စေတောဒုက္ခဒုက္ခာဘာဝတော. ဝိသံ နာမ ဒုက္ခံ အနိဋ္ဌဘာဝတော၊ တဿ မူလကာရဏံ ကောဓော အနိဋ္ဌဖလတ္တာတိ အာဟ ‘‘ဝိသမူလဿာတိ ဒုက္ခဝိပါကဿာ’’တိ. အက္ကုဋ္ဌဿာတိ အက္ကောသာပရာဓဿ. အက္ကောသပဟာရတ္ထသမ္ဗန္ဓေန ဟိ ‘‘ကုဒ္ဓဿာ’’တိ ဥပယောဂတ္ထေ သမ္ပဒါနဝစနံ. သုခံ ဥပ္ပဇ္ဇတိ ကောဓံ နဿတိ. သုခုပ္ပတ္တိံ သန္ဓာယ ဧသ ကောဓော ‘‘မဓုရဂ္ဂေါ’’တိ ဝုတ္တော၊ သုခါဝသာနောတိ အတ္ထော.

ဆေတွာသုတ္တဝဏ္ဏနာ နိဋ္ဌိတာ.