၈. ဥပ္ပထသုတ္တဝဏ္ဏနာ

၅၈. အမဂ္ဂေါတိ န မဂ္ဂေါ အနုပါယော. ရတ္တိန္ဒိဝက္ခယောတိ တတ္ထ ဝယက္ခဏဿ ပါကဋဘာဝတော. ဝုတ္တက္ခဏောပိ ဟိ သယံ ခီယတေဝ. သေသံ ဗာဟိရမလံ ဝတ္ထသရီရာဒိဘူတံ. တထာ ဟိ ‘‘ဘသ္မခါရာဒီဟိ ဓောဝိတွာ သက္ကာ သောဓေတု’’န္တိ ဝုတ္တံ. ဒုဋ္ဌောတိ ဒူသိတော သတ္တသန္တာနော န သက္ကာ သုဒ္ဓေါ နာမ ကာတုံ အဗ္ဘန္တရမလီနဘာဝါပါဒနတော. ဣတ္ထိယန္တိ ဗြဟ္မစရိယဿ အန္တရာယကရာယပိ. ပဇာတိ သတ္တကာယော သဇ္ဇတိ သင်္ဂံ ကရောတိ ယာထာဝတော အာဒီနဝံ အပဿန္တော. ဣန္ဒြိယသံဝရာဒိ ကိလေသာနံ တာပနတော တပေါ၊ တေနာဟ ‘‘သဗ္ဗာပီ’’တိအာဒိ.

ဥပ္ပထသုတ္တဝဏ္ဏနာ နိဋ္ဌိတာ.