၃. မိတ္တသုတ္တဝဏ္ဏနာ

၅၃. သဟ အတ္ထေန ဝတ္တတီတိ သတ္ထော၊ ဘဏ္ဍမူလံ ဂဟေတွာ ဝါဏိဇ္ဇဝသေန ဒေသန္တရာဒီသု ဝိစရဏကဇနသမူဟော. တေနာဟ ‘‘သဒ္ဓိံစရော’’တိ၊ သဟစရဏကောတိ အတ္ထော. မိတ္တန္တိ သိနေဟယောဂေန မိတ္တကိစ္စယုတ္တံ. ဣဓာဓိပ္ပေတပ္ပကာရံ ဒဿေတုံ ‘‘ရောဂေ ဥပ္ပန္နေ’’တိအာဒိ ဝုတ္တံ. တထာရူပေတိ ဇိဂုစ္ဆနီယေ၊ ဒုတ္တိကိစ္ဆေ ဝါ. ယထာ အသဏ္ဌိတာနံ သဏ္ဌာပနဝသေန ပဝသတော ပုရိသဿ ဘောဂဗျသနေ နာထတာ၊ ဧဝံ ပုတ္တသိနေဟဝသေန ပုတ္တဿ မာတုယာ အန္တောဂေဟေ နာထတာတိ ဝုတ္တံ ‘‘မာတာ မိတ္တံ သကေ ဃရေ’’တိ. အတ္ထဇာတဿာတိ ဥပဋ္ဌိတပယောဇနဿာတိ အတ္ထောတိ အာဟ ‘‘ဥပ္ပန္နကိစ္စဿာ’’တိ. သမ္ပရာယဟိတန္တိ သမ္ပရာယေ ဟိတာဝဟံ.

မိတ္တသုတ္တဝဏ္ဏနာ နိဋ္ဌိတာ.