၁. ဇရာသုတ္တဝဏ္ဏနာ

၅၁. ဟိတဿ သာဓနတော သာဓု၊ ယံ ကိဉ္စိ အတ္ထဇာတံ. တံ ပန အတ္ထကာမေန လဘိတဗ္ဗတော ဥပသေဝိတဗ္ဗတော လဒ္ဓကံ၊ ကလျာဏဋ္ဌေန ဘဒ္ဒကန္တိ ဝုစ္စတီတိ အာဟ ‘‘သာဓူတိ လဒ္ဓကံ ဘဒ္ဒက’’န္တိ. ‘‘သီလံ ယာဝ ဇရာ သာဓူ’’တိ ဝုတ္တမတ္ထံ ဗျတိရေကတော ဝိဘာဝေတုံ ‘‘ဣမိနာ ဣဒံ ဒဿေတီ’’တိ ဝုတ္တံ. ဣဒန္တိ ဣဒံ အတ္ထဇာတံ.

ပတိဋ္ဌိတာတိ စိတ္တသန္တာနေ လဒ္ဓပတိဋ္ဌာ၊ ကေနစိ အသံဟာရိယာ. တေနာဟ ‘‘မဂ္ဂေန အာဂတာ’’တိ. စိတ္တီကတဋ္ဌာဒီဟီတိ ပူဇနီယဘာဝါဒီဟိ. ဝုတ္တံ ဟေတံ ပေါရာဏဋ္ဌကထာယံ. စိတ္တီကတန္တိ ရတနန္တိ ဣဒံ ရတနံ နာမ လောကေ စိတ္တီကတံ ဝတ္ထူနံ သဟဿဂ္ဃနတာဒိဝသေန. ယေပိ လောကေ စိတ္တီကတာ ခတ္တိယပဏ္ဍိတ-စတုမဟာရာဇ-သက္က-သုယာမ-မဟာဗြဟ္မာဒယော၊ တေသံ စိတ္တီကတော တေဟိ သရဏန္တိ ဥပဂန္တဗ္ဗတာဒိဝသေန. ရတိကရန္တိ ပီတိသုခါဝဟံ. ဈာနရတိသုခေနာတိ ဒုဝိဓေနပိ ဈာနရတိသုခေန. တုလေတုန္တိ ပရိစ္ဆိန္ဒိတုံ. ဂုဏပါရမိန္တိ ဂုဏာနံ ဥက္ကံသပါရမိံ. ဒုလ္လဘော အနေကာနိ အသင်္ချေယျာနိ အတိဓာဝိတွာပိ လဒ္ဓုံ အသက္ကုဏေယျတ္တာ. အနောမောတိ အနူနော ပရိပုဏ္ဏော. တတ္ထ ဝိသေသတော အနောမသတ္တပရိဘောဂတော တေဟိ ‘‘သမ္မာသမ္ဗုဒ္ဓေါ ဘဂဝါ’’တိ အနုဿရိတဗ္ဗတောတိ အာဟ ‘‘ဘဂဝါ အနောမော သီလေနာ’’တိအာဒိ.

အရိယမဂ္ဂပညာယေဝ ဣဓ အဓိပ္ပေတာတိ ‘‘ဣဓ ပန ဒုလ္လဘပါတုဘာဝဋ္ဌေန ပညာ ‘ရတန’န္တိ ဝုတ္တ’’န္တိ အာဟ. ပုဇ္ဇဖလနိဗ္ဗတ္တနတော၊ အတ္တနော သန္တာနံ ပုနာတီတိ စ ပုညစေတနာ ပုညံ၊ သာ ပန ယဿ ဥပ္ပန္နာ၊ တဿေဝ အာဝေဏိကတာယ အနညသာဓာရဏတ္တာ ကေနစိပိ အနာဟဋာ၊ အဋ္ဌကထာယံ ပန ‘‘အရူပတ္တာ’’တိ ဝုတ္တံ.

ဇရာသုတ္တဝဏ္ဏနာ နိဋ္ဌိတာ.