၃. အန္နသုတ္တဝဏ္ဏနာ

၄၃. ပတ္ထေန္တီတိ ပိဟေန္တိ. ယတ္ထဿ ဥပဂမနံ လောကေ ပါကဋတရံ အဟောသိ၊ တေ ဥဒါဟရဏဝသေန ဒဿေန္တော ‘‘စိတ္တဂဟပတိသီဝလိတ္ထေရာဒိကေ ဝိယာ’’တိ အာဟ. အန္နန္တိ အန္နသညိတော စတုဗ္ဗိဓောပိ ပစ္စယော. သဗ္ဗေပိ ဒါယကေ ဧကဇ္ဈံ ဂဟေတွာ သာမညတော ဧကဝသေန ‘‘ဒါယကမေဝါ’’တိ ဝုတ္တံ၊ ယထာ စာဟ ‘‘ကော နာမ သော ယက္ခော၊ ယံ အန္နံ နာဘိနန္ဒတီ’’တိ? တတ္ထ ယက္ခောတိ သတ္တော. သာမညဇောတနာ စ နာမ ယသ္မာ ပုထုအတ္ထဝိသယာ၊ တသ္မာ ‘‘ယေ နံ ဒဒန္တိ သဒ္ဓါယ၊ ဝိပ္ပသန္နေန စေတသာ. တမေဝ အန္နံ ဘဇတီ’’တိ ဝုတ္တံ. တတ္ထ မ-ကာရော ပဒသန္ဓိကရော၊ တေ ဧဝါတိ အတ္ထော. ဒါယကံ အပရိစ္စဇနမေဝ အနုဂစ္ဆတိ စက္ကံ ဝိယ ကုဗ္ဗရံ.

အန္နသုတ္တဝဏ္ဏနာ နိဋ္ဌိတာ.