၄. မနောနိဝါရဏသုတ္တဝဏ္ဏနာ

၂၄. ဧဝံလဒ္ဓိကာတိ သဗ္ဗထာပိ စိတ္တုပ္ပတ္တိ သဒုက္ခာ၊ သဗ္ဗထာပိ အစိတ္တကဘာဝေါ သေယျော၊ တသ္မာ ယတော ကုတောစိ စိတ္တံ နိဝါရေတဗ္ဗန္တိ ဧဝံဒိဋ္ဌိကာ. သောတိ သတ္တော. အနိယျာနိကကထံ ကထေတိ အယောနိသော စိတ္တနိဝါရဏံ ဝဒန္တီ. သံယတဘာဝံ အာဂတန္တိ ရာဂဝိသေဝနာဒိတော သမ္မဒေဝ သံယတဘာဝံ ဩတရဘာဝံ. ဓမ္မစရိယာဝသေန ဟိ ပဝတ္တမာနေ စိတ္တေ နတ္ထိ ဤသကမ္ပိ ရာဂါဒိဝိသေဝနံ၊ န တဿ သမ္ပတိ အာယတိဉ္စ ကောစိ အနတ္ထော သိယာ၊ တသ္မာ တံ မနော သဗ္ဗတော အနဝဇ္ဇဝုတ္တိတော န နိဝါရေတဗ္ဗံ. တေနာဟ ‘‘ဒါနံ ဒဿာမီ’’တိအာဒိ. ယတော ယတောတိ ယတော ယတော သာဝဇ္ဇဝုတ္တိတော အယောနိသောမနသိကာရတော. တန္တိ မနော နိဝါရေတဗ္ဗံ အနတ္ထာဝဟတ္တာ.

မနောနိဝါရဏသုတ္တဝဏ္ဏနာ နိဋ္ဌိတာ.