၇. ဒုက္ကရသုတ္တဝဏ္ဏနာ

၁၇. ဒုက္ခံ တိတိက္ခန္တိ ဒုတ္တိတိက္ခံ. တဉ္စ ဒုက္ခမံ ဒုဿဟနံ အာရမ္ဘဝသေန ဒုက္ကရံ၊ အနုယုဉ္ဇနဝသေန ဒုတ္တိတိက္ခန္တိ. အဗျတ္တေနာတိ သာမညဿ ဥပကာရာနုပကာရေ ဓမ္မေ ဇာနနသမတ္ထာယ ဝေယျတ္တိယသင်္ခါတာယ ပညာယ အဘာဝတော န ဗျတ္တေန. တေနာဟ ‘‘ဗာလေနာ’’တိ. ယသ္မိံ ဓမ္မေ သတိ သမဏောတိ ဝုစ္စတိ၊ တံ သာမညန္တိ အာဟ ‘‘သမဏဓမ္မော’’တိ. ဣမိနာတိ ‘‘ဒုက္ကရံ ဒုတ္တိတိက္ခဉ္စ၊ အဗျတ္တေန စ သာမည’’န္တိ ဣမိနာ ဂါထဒ္ဓေန ဣဒံ ဒဿေတီတိ ဣဒံ ဣဒါနိ ဝုစ္စမာနံ အတ္ထဇာတံ ဒဿေတိ. အဘိဒန္တန္တိ အဘိဘဝနဒန္တံ၊ ဥပရိဒန္တန္တိ အတ္ထော. သော ဟိ ဣတရံ မုသလံ ဝိယ ဥဒုက္ခလံ ဝိသေသတော ကဿစိ ခါဒနကာလေ အဘိဘုယျ ဝတ္တတိ. အာဓာယာတိ နိပ္ပီဠနဝသေနေဝ ဌပေတွာ. တာလုံ အာဟစ္စာတိ တာလုပဒေသမာဟနိတွာ ဝိယ. စေတသာတိ ကုသလစိတ္တေန. စိတ္တန္တိ အကုသလစိတ္တံ. အဘိနိဂ္ဂဏှိတွာတိ ယထာ အတိသမုဒါစာရော န ဟောတိ၊ ဧဝံ ဝိဗာဓနဝသေန နိဂ္ဂဟေတွာ. အာပါဏကောဋိကန္တိ ပါဏကောဋိပရိယောသာနံ၊ ပရိဇီဝန္တိ အတ္ထော. သမ္ဗာဓေတီတိ သမ္ဗာဓော၊ အန္တရာယိကော. ဗဟူ ပရိဿယာတိ အယောနိသော ကာမဝိတက္ကာဒိဝသေန.

ပဇ္ဇတိ စိတ္တမေတ္ထာတိ ပဒံ၊ အာရမ္မဏံ. ဣရိယာပထံ ဧဝ ပဒံ ဣရိယာပထပဒံ.

ဂီဝါ စတ္တာရော ပါဒါတိ ဂီဝပဉ္စမာနိ. သမောဒဟန္တိ ဝါ သမောဓာနဟေတူတိ အယမေတ္ထ အတ္ထောတိ အာဟ – ‘‘သမောဒဟိတွာ ဝါ’’တိ၊ သမ္မာ ဩဓာယ အန္တော ပဝေသေတွာတိ အတ္ထော. သကေ အာရမ္မဏကပါလေတိ ဂေါစရဇ္ဈတ္တံ ဝဒတိ. သမောဒဟန္တိ သမောဒဟန္တော. အနိဿိတောတိ တေဘူမကဓမ္မေသု ကဉ္စိပိ ဓမ္မံ တဏှာဒိဋ္ဌာဘိနိဝေသဝသေန အနိဿိတော. အဝိဟိံသမာနော ဝိဟိံသာနိမိတ္တာနံ ပဇဟနေန. ဥလ္လုမ္ပနသဘာဝသဏ္ဌိတေနာတိ သီလဗျသနတော ဥဒ္ဓရဏရူပေ သဏ္ဌိတေန၊ ကရုဏာယုတ္တေနာတိ အတ္ထော. တေနာဟ ‘‘ကာရုညတံ ပဋိစ္စာ’’တိ.

ဒုက္ကရသုတ္တဝဏ္ဏနာ နိဋ္ဌိတာ.