၉. မာနကာမသုတ္တဝဏ္ဏနာ

၉. သေယျာဒိဘေဒံ မာနံ အပ္ပဟာယ တံ ပဂ္ဂယှ ဝိစရန္တော ကာမေန္တော နာမ ဟောတီတိ အာဟ ‘‘မာနံ ကာမေန္တဿ ဣစ္ဆန္တဿာ’’တိ. ဒမတိ စိတ္တံ ဧတေနာတိ ဒမော၊ သတိသမ္ဗောဇ္ဈင်္ဂါဒိကော သမာဓိပက္ခိကော ဒမော. မနစ္ဆဋ္ဌာနိ ဣန္ဒြိယာနိ ဒမေတီတိ ဒမော၊ ဣန္ဒြိယသံဝရော. ကိလေသေ ဒမေတိ ပဇဟတီတိ ဒမော၊ ပညာ. ဥပဝသနဝသေန ကာယကမ္မာဒိံ ဒမေတီတိ ဒမော၊ ဥပေါသထကမ္မံ. ကောဓူပနာဟမက္ခမာနာဒိကေ ဒမေတိ ဝိနေတီတိ ဒမော၊ အဓိဝါသနခန္တိ. တေနေဝါတိ ‘‘ဒမော’’တိ သမာဓိပက္ခိကဓမ္မာနံ ဧဝ အဓိပ္ပေတတ္တာ. ‘‘န မောနံ အတ္ထီ’’တိ စ ပါဌော. အသမာဟိတဿာတိ သမာဓိပဋိက္ခေပေါ ဇောတိတော.

မစ္စုဓေယျဿ ပါရတရဏဿ ဝုစ္စမာနတ္တာ ‘‘မောနန္တိ စတုမဂ္ဂဉာဏ’’န္တိ ဝုတ္တံ. န ဟိ တတော အညေန တံ သမ္ဘဝတိ. ဇာနာတိ အသမ္မောဟပဋိဝေဓဝသေန ပဋိဝိဇ္ဈတီတိ အတ္ထော. မစ္စု ဓီယတိ ဧတ္ထာတိ မစ္စုဓေယျံ၊ ခန္ဓပဉ္စကံ မရဏဓမ္မတ္တာ. တဿေဝါတိ မစ္စုဓေယျဿေဝ. ပါရံ ပရတီရဘူတံ နိဗ္ဗာနံ. တရေယျာတိ ဧတ္ထ တရဏံ နာမ အရိယမဂ္ဂဗျာပါရောတိ အာဟ ‘‘ပဋိဝိဇ္ဈေယျ ပါပုဏေယျာ’’တိ. တထာ ဟိ ဝက္ခတိ ‘‘ပဋိဝေဓတရဏံ နာမ ဝုတ္တ’’န္တိ. ‘‘န တရေယျ န ပဋိဝိဇ္ဈေယျ န ပါပုဏေယျ ဝါ’’တိ အယမေတ္ထ ပါဌော ယုတ္တော. အညထာ ‘‘ဣဒံ ဝုတ္တံ ဟောတီ’’တိအာဒိဝစနံ ဝိရုဇ္ဈေယျ. ဧကော အရညေ ဝိဟရန္တောတိ ဧကာကီ ဟုတွာ အရညေ ဝိဟရန္တောတိ အတ္ထော.

ကာမံ ဟေဋ္ဌိမမဂ္ဂေဟိပိ ဧကစ္စဿ မာနဿ ပဟာနံ လဗ္ဘတိ. အဂ္ဂမဂ္ဂေနေဝ ပန တဿ အနဝသေသတော ပဟာနန္တိ အာဟ – ‘‘အရဟတ္တမဂ္ဂေန နဝဝိဓမာနံ ပဇဟိတွာ’’တိ. ဥပစာရသမာဓိပုဗ္ဗကော အပ္ပနာသမာဓီတိ ဝုတ္တံ ‘‘ဥပစာရပ္ပနာသမာဓီဟီ’’တိ၊ န ဥပစာရသမာဓိမတ္တေန သမာဓိမတ္တံ သန္ဓာယ ပစ္စေကံ ဝါကျပရိသမာပနဿ အယုဇ္ဇနတော. န ဟိ အပ္ပနံ အပ္ပတ္တံ လောကုတ္တရဇ္ဈာနံ အတ္ထိ. ‘‘သုစေတသော’’တိ စိတ္တဿ ဉာဏသဟိတတာယ လက္ခဏဝစနန္တိ အာဟ ‘‘ဉာဏသမ္ပယုတ္တတာယာ’’တိအာဒိ. တထာ ဟိ ဝက္ခတိ ‘‘သုစေတသောတိ ဧတ္ထ စိတ္တေန ပညာ ဒဿိတာ’’တိ. ‘‘သဗ္ဗဓိ ဝိပ္ပမုတ္တော’’တိ သဗ္ဗေသု ဘဝါဒီသု ဝိသံသဋ္ဌစိတ္တော သဗ္ဗသော ခန္ဓာဒီဟိ ဝိသံယုတ္တော ဟောတီတိ ဝုတ္တံ ‘‘သဗ္ဗေသု ခန္ဓာယတနာဒီသု ဝိပ္ပမုတ္တော ဟုတွာ’’တိ. ပရိညာပဋိဝေဓော သစ္ဆိကိရိယပဋိဝေဓေန ဝိနာ နတ္ထီတိ အာဟ ‘‘တေဘူမက။ပေ။ ဝုတ္တ’’န္တိ.

မာနံ နိဿာယ ဒုစ္စရိတစရဏတော မာနော နာမာယံ သီလဘေဒနော. တသ္မာတိ မာနဿ သီလပဋိပက္ခဘာဝတော. ဣမိနာ ပဋိပက္ခပ္ပဟာနကိတ္တနေန. အဓိစိတ္တသိက္ခာ ကထိတာ သရူပတော ဧဝါတိ အဓိပ္ပါယော. ဧတ္ထ စိတ္တေနာတိ သု-သဒ္ဒေန ဝိသေသိတစိတ္တေန. တသ္မာတိ ပညာယ ဒဿိတတ္တာ. ဣမိနာတိ ‘‘သုစေတသော’’တိ ဣမိနာ ပဒေန. အဓိသီလသိက္ခာ အဓိစိတ္တသိက္ခာ အဓိပညာသိက္ခာတိ သီလာဒီနိပိ ဝိသေသေတွာ ဝုတ္တာနိ. သမ္ဘဝေ ဗျဘိစာရေ စ ဝိသေသနဝိသေသိတဗ္ဗတာတိ တံ ဒဿေန္တော ‘‘အဓိသီလဉ္စ နာမ သီလေ သတိ ဟောတီ’’တိအာဒိံ ဝတွာ တဒုဘယံ ဝိဘာဂေန ဒဿေတုံ ‘‘တသ္မာ’’တိအာဒိ ဝုတ္တံ. ပဌမနယော သင်္ကရဝသေန ပဝတ္တောတိ အသင်္ကရဝသေန ဒဿေတုံ ‘‘အပိစာ’’တိအာဒိနာ ဒုတိယနယော ဝုတ္တော. ‘‘သမာပန္နာ’’တိ ဧတ္ထာပိ ‘‘နိဗ္ဗာနံ ပတ္ထယန္တေနာ’’တိ အာနေတွာ သမ္ဗန္ဓော. ဝိပဿနာယ ပါဒကဘာဝံ အနုပဂတာပိ တဒတ္ထံ နိဗ္ဗတ္တနာဒိဝသေန သမာပန္နာတိ အယမတ္ထော ပုရိမနယတော ဝိသေသော. အဓိပညာယ ပနေတ္ထ ပုရိမနယတော ဝိသေသော နတ္ထီတိ သာ အနုဒ္ဓဋာ. သမောဓာနေတွာတိ ပရိယာယတော သရူပတော စ သင်္ဂဟေတွာ. သကလသာသနန္တိ တိဿန္နံ ကထိတတ္တာ ဧဝ သိက္ခတ္တယသင်္ဂဟံ သကလသာသနံ ကထိတံ ဟောတီတိ.

မာနကာမသုတ္တဝဏ္ဏနာ နိဋ္ဌိတာ.