၅. ကတိဆိန္ဒသုတ္တဝဏ္ဏနာ

၅. ဆိန္ဒန္တောတိ သမုစ္ဆိန္ဒန္တော. ကတိ ဆိန္ဒေယျာတိ ကိတ္တကေ ပါပဓမ္မေ သမုစ္ဆိန္ဒေယျ၊ အနုပ္ပတ္တိဓမ္မတံ ပါပေယျ. သေသပဒေသုပီတိ သေသေသုပိ ဒွီသု ပဒေသု. ဇဟန္တော ကတိ ဇဟေယျ၊ ဘာဝေန္တော ကတိ ဥတ္တရိ ဘာဝေယျာတိ ဣမမတ္ထံ ‘‘ဧသေဝ နယော’’တိ ဣမိနာ အတိဒိသတိ. စတုတ္ထပဒဿ ပန အတ္ထော သရူပေနေဝ ဒဿိတော. အတ္ထတော ဧကန္တိ ဘာဝတ္ထတော ဧကံ. ယဒိ ဧဝံ ကိမတ္ထံ ပရိယာယန္တရံ ဂဟိတန္တိ အာဟ ‘‘ဂါထာဗန္ဓဿ ပနာ’’တိအာဒိ. အတ္ထတော ဧတ္ထ ပုနရုတ္တိ အတ္ထေဝါတိ အာဟ ‘‘သဒ္ဒပုနရုတ္တိံ ဝဇ္ဇယန္တီ’’တိ. သင်္ဂံ အတိက္ကမယတီတိ သင်္ဂါတိဂေါတိ အာဟ ‘‘အယမေဝတ္ထော’’တိ.

ဩရံ ဝုစ္စတိ ကာမဓာတု၊ ပဋိသန္ဓိယာ ပစ္စယဘာဝေန တဉ္စ ဘဇန္တီတိ ဩရမ္ဘာဂိယာနိ. တတ္ထ စ ကမ္မံ တဗ္ဗိပါကံ သတ္တေ ဒုက္ခံ၊ ကမ္မုနာ ဝိပါကံ၊ သတ္တေန ဒုက္ခံ သံယောဇေန္တီတိ သံယောဇနာနိ၊ သက္ကာယဒိဋ္ဌိ-ဝိစိကိစ္ဆာ-သီလဗ္ဗတပရာမာသ-ကာမရာဂ-ပဋိဃာ. ဥဒ္ဓံ ဝုစ္စတိ စတဿော အရူပဓာတုယော၊ ဝုတ္တနယေန တံ ဘဇန္တီတိ ဥဒ္ဓမ္ဘာဂိယာနိ၊ သံယောဇနာနိ ရူပါရူပရာဂမာနုဒ္ဓစ္စာဝိဇ္ဇာ. အာရောပိတဝစနာနုရူပေနေဝ ဧဝမာဟာတိ ‘‘ပဉ္စ ဆိန္ဒေ ပဉ္စ ဇဟေ’’တိ ဧဝံ ကထေသိ တဿာ ဒေဝတာယ သုခဂ္ဂဟဏတ္ထံ. န ကေဝလံ တာယ ဒေဝတာယ ဝုတ္တဝစနာနုရူပတော ဧဝ၊ အထ ခေါ တေသု သံယောဇနေသု ဝတ္တဗ္ဗာကာရတောပီတိ ဒဿေတုံ ‘‘အထ ဝါ’’တိအာဒိ ဝုတ္တံ. တေန ဩရမ္ဘာဂိယသံယောဇနာနိ နာမ ဂရူနိ ဒုစ္ဆေဒါနိ ဂါဠှဗန္ဓနဘာဝတော၊ တသ္မာ တာနိ သန္ဓာယ ‘‘ပဉ္စ ဆိန္ဒေ’’တိ ဝုတ္တံ.

ဥဒ္ဓမ္ဘာဂိယသံယောဇနာနိ ပန လဟူနိ သုစ္ဆေဒါနိ ဟေဋ္ဌာ ပဝတ္တိတာနုက္ကမေန ဘာဝနာနယေန ပဟာတဗ္ဗတော၊ တသ္မာ တာနိ သန္ဓာယ ‘‘ပဉ္စ ဇဟေ’’တိ ဝုတ္တံ. တေနာဟ ‘‘ပါဒေသု ဗဒ္ဓပါသသကုဏော ဝိယာ’’တိအာဒိ. ဝိသေသန္တိ ဘာဝနာနံ ဝိသေသံ ဝိပဿနာဘာဝနံ ဘာဝေန္တော ဥပ္ပါဒေန္တော ဝိပစ္စေန္တော ဝဍ္ဎေန္တော စ. သံသာရပင်္ကေ သဉ္ဇနဋ္ဌေန ရာဂေါ ဧဝ သင်္ဂေါ ‘‘ရာဂသင်္ဂေါ’’. ဧသ နယော သေသေသုပိ. ယသ္မာ ဧတ္ထ ရာဂ-မောဟ-ဒိဋ္ဌိ-တဗ္ဘာဂိယသက္ကာယဒိဋ္ဌိ-သီလဗ္ဗတပရာမာသ-ကာမရာဂါဝိဇ္ဇာ အတ္ထတော ဩဃာ ဧဝ၊ ဣတရေ တဒေကဋ္ဌာ၊ တသ္မာ ဘဂဝါ သံယောဇနပ္ပဟာနသင်္ဂါတိက္ကမေဟိ ဩဃတရဏံ ကထေသိ. လောကိယလောကုတ္တရာနိ ကထိတာနိ ‘‘ဘာဝယေ’’တိ ပုဗ္ဗဘာဂါယ မဂ္ဂဘာဝနာယ အဓိပ္ပေတတ္တာ.

ကတိဆိန္ဒသုတ္တဝဏ္ဏနာ နိဋ္ဌိတာ.