၂၇၅. ပါလိလေယျကဂမနကထာ

၄၆၇. ပါလိလေယျကန္တိ ပလိလဝနသဏ္ဍေ ဝသန္တဟတ္ထိနာဂံ. ‘‘ဟတ္ထီ’’တိ စ ‘‘နာဂေါ’’တိ စ ဒွိန္နံ သဒ္ဒါနံ ပရိယာယဘာဝေန ဝုတ္တတ္တာ အဓိကတ္ထောတိ အာဟ ‘‘မဟာဟတ္ထီ’’တိ. ပုရတော ပုရတော ဂစ္ဆန္တေဟိ တေဟိ ဟတ္ထိအာဒီဟိ ဆိန္နဂ္ဂါနီတိ ယောဇနာ. ဩဘဂ္ဂေါဘဂ္ဂန္တိ ဘဉ္ဇိတွာ အဓောပါတိတံ ဩဘဂ္ဂန္တိ ဒဿေန္တော အာဟ ‘‘ဘဉ္ဇိတွာ ဘဉ္ဇိတွာ ပါတိတ’’န္တိ. ‘‘ဥစ္စဋ္ဌာနတော’’တိ ဣမိနာ အဝတျူပသဂ္ဂဿ အဓောတ္ထံ နယေန ဒဿေတိ. ဧတဿာတိ ဟတ္ထိနာဂဿ. တေတိ ဟတ္ထိအာဒယော. တေဟီတိ ဟတ္ထိအာဒီဟိ. ပိဝန္တေဟိ တေဟီတိ ယောဇနာ. ကဒ္ဒမောဒကာနီတိ ကဒ္ဒမေန သံသဋ္ဌာနိ ဥဒကာနိ.

ဤသာဒန္တဿာတိ ဧတ္ထ ဤသာယ သဒိသော ဒန္တော ဣမဿာတိ ဤသာဒန္တောတိ ဒဿေန္တော အာဟ ‘‘ရထဤသာသဒိသဒန္တဿာ’’တိ. ‘‘ရထဤသာ’’တိ ဣမိနာ နင်္ဂလဤသံ နိဝတ္တေတိ. ယဒေကောတိ ယံ ဧကော. ယံသဒ္ဒေါ ကာရဏတ္ထောတိ အာဟ ‘‘ယသ္မာ’’တိ. အဿ နာဂဿာတိ ဟတ္ထိနာဂဿ. နာဂေနာတိ ဗုဒ္ဓနာဂေန.

ယထာဘိရန္တန္တိ ဧတ္ထ ကိတ္တကံ ကာလံ ရမတီတိ အာဟ ‘‘တေမာသ’’န္တိ. ဧတ္တာဝတာတိ ဧတ္တကေန တေမာသဝိဟရဏေန. ပတ္ထဋာ အဟောသီတိ သမ္ဗန္ဓော. သဗ္ဗတ္ထာတိ သဗ္ဗသ္မိံ ဇမ္ဗုဒီပတလေ.

‘‘ကောသမ္ဗိနိဝါသိနော’’တိ ဣမိနာ ကောသမ္ဗိယံ နိဝသန္တီတိ ကောသမ္ဗကာတိ ဝစနတ္ထံ ဒဿေတိ.