၁. ပဌမသိက္ခာပဒ-အတ္ထယောဇနာ

၉၇၈. စိတ္တာဂါရဝဂ္ဂဿ ပဌမေ ရညော ကီဠနဋ္ဌာနံ အဂါရံ ရာဇာဂါရန္တိ ဝစနတ္ထံ ဒဿေန္တော အာဟ ‘‘ရညော ကီဠနဃရ’’န္တိ. စိတ္တံ အဂါရံ စိတ္တာဂါရံ. အာရာမန္တိ နဂရတော နာတိဒူရအာရာမောတိ အာဟ ‘‘ဥပဝန’’န္တိ. ဥယျာနန္တိ သမ္ပန္နပုပ္ဖဖလတာယ ဥဒ္ဓံ ဥလ္လောကေတွာ မနုဿာ ယန္တိ ဂစ္ဆန္တိ ဧတ္ထာတိ ဥယျာနံ. ပေါက္ခရဏိန္တိ ပေါက္ခရံ ပဒုမံ နေတီတိ ပေါက္ခရဏီ. ပဉ္စပီတိ ရာဇာဂါရာဒီနိ ပဉ္စပိ. သဗ္ဗတ္ထာတိ ဒဿနတ္ထာယ ဂမနေ စ ဂန္တွာ ပဿနေ စာတိ သဗ္ဗေသု.

၉၈၁. ‘‘အဇ္ဈာရာမေ’’တိအာဒိနာ အာရာမေ ဌိတာယ အာရာမတော ဗဟိ ကတေ ရာဇာဂါရာဒိကေ ပဿန္တိယာပိ အနာပတ္တီတိ ဒဿေတိ. တာနီတိ ရာဇာဂါရာဒီနီတိ. ပဌမံ.