၆. ဆဋ္ဌသိက္ခာပဒံ

၉၀၉. ဆဋ္ဌေ ‘‘အညံ ပရိက္ခာရ’’န္တိဧတ္ထ ပရိက္ခာရဿ သရူပံ ဒဿေန္တော အာဟ ‘‘ယံကိဉ္စီ’’တိအာဒိ. ယံကိဉ္စိ အညတရန္တိ သမ္ဗန္ဓော. ကိတ္တကံအဂ္ဃနကန္တိ ကိံ ပမာဏေန အဂ္ဃေန အရဟံ စီဝရံ. ဒါတုကာမတ္ထာတိ တုမှေ ဒါတုကာမာ ဘဝထာတိ အတ္ထော. ကတိပါဟေနာတိ ကတိပယာနိ အဟာနိ ကတိပါဟံ၊ ယကာရလောပေါ. ကတိပယသဒ္ဒေါဟိ ဒွိတိဝါစကော ရူဠှီသဒ္ဒေါ၊ တေန ကတိပါဟေန. သမဂ္ဃန္တိ အပ္ပဂ္ဃံ. သံသဒ္ဒေါ ဟိ အပ္ပတ္ထဝါစကောတိ. ဆဋ္ဌံ.