၄. စတုတ္ထသိက္ခာပဒံ

၈၉၈. စတုတ္ထေ ပဉ္စာဟန္တိ သမာဟာရဒိဂု၊ ဏိကပစ္စယော သွတ္ထော. သင်္ဃာဋိစာရောတိဧတ္ထ ကေနဋ္ဌေန သင်္ဃာဋိ နာမ၊ စာရသဒ္ဒေါ ကိမတ္ထောတိ အာဟ ‘‘ပရိဘောဂဝသေန ဝါ’’တိအာဒိ. တတ္ထ သင်္ဃဋိတဋ္ဌေနာတိ သံဟရိတဋ္ဌေန. ဣမိနာ ‘‘ကေနဋ္ဌေန သင်္ဃာဋိ နာမာ’’တိ ပုစ္ဆံ ဝိသဇ္ဇေတိ. ‘‘ပရိဝတ္တန’’န္တိ ဣမိနာ ‘‘စာရသဒ္ဒေါ ကိမတ္ထော’’တိ စောဒနံ ပရိဟရတိ. ပဉ္စသူတိ တိစီဝရံ ဥဒကသာဋိကာ သံကစ္စိကာတိ ပဉ္စသူတိ. စတုတ္ထံ.