၉. နဝမသိက္ခာပဒံ

၈၇၅. နဝမေ အဘိသပေယျာတိ ဧတ္ထ သပဓာတုဿ အက္ကောသနတ္ထံ အန္တောကတွာ ကရဓာတုယာ အတ္ထံ ဒဿေန္တော အာဟ ‘‘သပထံ ကရေယျာ’’တိ. နိရယေ နိဗ္ဗတ္တာမှီတိ အဟံ နိရယေ နိဗ္ဗတ္တာ အမှီတိ ယောဇနာ. နိရယေ နိဗ္ဗတ္တတူတိ ဧသာ ဘိက္ခုနီ နိရယေ နိဗ္ဗတ္တတူတိ ယောဇနာ. ဤဒိသာ ဟောတူတိ မမ သဒိသာ ဟောတူတိ အတ္ထော. ကာဏာတိ ဧကက္ခိကာဏာ၊ ဒွက္ခိကာဏာ ဝါ. ကုဏီတိ ဟတ္ထပါဒါဒိဝင်္ကာ.

၈၇၈. ဧဒိသာတိ ဝိရူပါဒိဇာတိကာ. ဝိရမဿူတိ ဝိရမာဟိ. အဒ္ဓါတိ ဓုဝန္တိ. နဝမံ.