၁၀. ဒသမသိက္ခာပဒံ

၁၀၆၂. ဒသမေ ဒွေ ကာယာ ဥပရိမကာယော ဟေဋ္ဌိမကာယောတိ. တတ္ထ ကဋိတော ဥဒ္ဓံ ဥပရိမကာယော၊ ဟေဋ္ဌာ ဟေဋ္ဌိမကာယော. တတ္ထ ‘‘ပသာခေ’’တိ ဣဒံ ဟေဋ္ဌိမကာယဿ နာမန္တိ အာဟ ‘‘အဓောကာယေ’’တိ. ဟီတိ သစ္စံ. တတောတိ အဓောကာယတော. ဣမိနာ ပဉ္စမီဗာဟိရတ္ထသမာသံ ဒဿေတိ. ရုက္ခဿ သာခါ ပဘိဇ္ဇိတွာ ဂတာ ဝိယ ဥဘော ဦရူ ပဘိဇ္ဇိတွာ ဂတာတိ ယောဇနာ.

၁၀၆၅. ဖာလေဟီတိ ဧတ္ထ ဣတိသဒ္ဒေါ အာဒျတ္ထော. တေန ‘‘ဓောဝါ’’တိအာဒီနိ စတ္တာရိ ပဒါနိ သင်္ဂဏှာတိ. အာဏတ္တိဒုက္ကဋာနီတိ ဟေဋ္ဌာ ဝုတ္တေသု အဋ္ဌသု ဒုက္ကဋေသု ဝိနယဒုက္ကဋမေဝ. သေသေသူတိ ဘိန္ဒနတော သေသေသု ဖာလနာဒီသူတိ. ဒသမံ.

အာရာမဝဂ္ဂေါ ဆဋ္ဌော.