၆. ဆဆက္ကသုတ္တဝဏ္ဏနာ

၄၂၀. အာဒိမှိ ကလျာဏန္တိ အာဒိကောဋ္ဌာသေ ကလျာဏံ ဧတဿာတိ ဝါ အာဒိကလျာဏော၊ တံ အာဒိကလျာဏံ၊ အာဒိကလျာဏဘာဝေါ စ ဒေါသဝိဂမေန ဣစ္ဆိတဗ္ဗော. ယဉှိ သဗ္ဗသော ဝိဂတဒေါသံ၊ တံ ပရိပုဏ္ဏဂုဏမေဝ ဟောတီတိ ‘‘နိဒ္ဒေါသ’’န္တိ ဝုတ္တံ. ကတွာတိ စ ပဒံ၊ ‘‘ကလျာဏံ ကတွာ ဘဒ္ဒကံ ကတွာ’’တိ ပုရိမပဒဒွယေနပိ ယောဇေတဗ္ဗံ. ဒေသနာကာရော ဟိ ဣဓ ကလျာဏသဒ္ဒေန ဂဟိတော. တေနေဝါဟ – ‘‘ဒေသေတဗ္ဗဓမ္မဿ ကလျာဏတာ ဒဿိတာ ဟောတီ’’တိ၊ ဒုတိယေ ပန အတ္ထဝိကပ္ပေ ဒေသေတဗ္ဗဓမ္မဿ ကလျာဏတာ မုချေနေဝ ကထိတာ ဣတရဿ အတ္ထာပတ္တိတော. မဇ္ဈေကလျာဏံ ပရိယောသာနကလျာဏန္တိ ဧတ္ထာပိ ဧသေဝ နယော. အယဉ္စ ဒေသနာယ ထောမနာ ဗုဒ္ဓါနံ အာစိဏ္ဏသမာစိဏ္ဏာဝါတိ ဒဿေတုံ၊ ‘‘ဣတိ ဘဂဝါ အရိယဝံသ’’န္တိအာဒိ ဝုတ္တံ. ဓမ္မဂ္ဂဟဏမ္ပိ ဒေသနာယ ထောမနာ ဧဝါတိ ‘‘နဝဟိ ပဒေဟီ’’တိ ဝုတ္တံ.

ဝေဒနာ ယာထာဝတော ဇာနနံ၊ တဉ္စ မဂ္ဂကိစ္စံ၊ တဿ ဥပါယော ဝိပဿနာတိအာဟ – ‘‘သဟဝိပဿနေန မဂ္ဂေန ဇာနိတဗ္ဗာနီ’’တိ. ပရိညာဘိသမယာဒိကိစ္စေန နိဗ္ဗတ္တိယာ အသမ္မောဟတော စ ပဋိဝိဇ္ဈိတဗ္ဗော. တေဘူမကစိတ္တမေဝ ကထိတံ သမ္မသနဋ္ဌာနဿ အဓိပ္ပေတတ္တာ. ဧသ နယော ဓမ္မာယတနာဒီသုပိ. ဓမ္မာယတနဿ ဝါ အာယတနဘာဝတော ဗဟိဒ္ဓါဂဟဏံ၊ န သဗ္ဗသော အနဇ္ဈတ္တဘာဝတော. ဝိပါကဝေဒနာပစ္စယာ ဇဝနက္ခဏေ ဥပ္ပန္နတဏှာတိ ဆတ္တိံသဝိပါကဝေဒနံ နိဿာယ ဧဝံ အဿာဒေန္တီ အနုဘဝေယျန္တိ အကုသလဇဝနက္ခဏတော ဥပ္ပန္နတဏှာ.

၄၂၂. ပါဋိယေက္ကော အနုသန္ဓီတိ ယထာနုသန္ဓိအာဒီနံ အသမ္ဘဝတောတိ အဓိပ္ပါယေန ဝုတ္တံ. ဟေဋ္ဌာတိ ဝိညာဏဖဿဝေဒနာတဏှာနံ ပစ္စယာယတ္တဝုတ္တိတာဒဿနေန စက္ခာယတနာဒီနံ ရူပါယတနာဒီနဉ္စ ပစ္စယာယတ္တဝုတ္တိတာ ဒီပိတာ အပစ္စယုပ္ပန္နဿ ပစ္စယာဘာဝတော၊ ယဉ္စ ပစ္စယာယတ္တဝုတ္တိကံ၊ တံ အနိစ္စံ ဥပ္ပါဒသမ္ဘဝတော၊ ယဒနိစ္စံ တံ ဒုက္ခံ၊ ယံ ဒုက္ခံ တဒနတ္တာတိ ခန္ဓပဉ္စကေ စ ဆန္နံ ဆက္ကာနံ ဝသေန ဃနဝိနိဗ္ဘောဂကရဏေန အတ္ထတော အနတ္တလက္ခဏံ ဝိဘာဝိတံ. န သရူပတောတိ သရူပတောပိ တံ ဝိဘာဝေတုကာမော တေနေဝ ဆဆက္ကာနံ ဝသေန ဃနဝိနိဗ္ဘောဂနယေန ဗျတိရေကတော စ အနွယတော စ ဒဿေန္တော ဘဂဝါ – ‘‘စက္ခု အတ္တာတိ ယော ဝဒေယျာ’’တိအာဒိမာဟာတိ ယထာနုသန္ဓိကာဝ ဒေသနာ ဝိဘာဝိတာ. တေနာဟ ‘‘ဟေဋ္ဌာ ကထိတာနံ ဟီ’’တိအာဒိ. ဟေဋ္ဌာ ပန ဆန္နံ ဆက္ကာနံ ဝသေန ဝိနိဗ္ဘောဂဒဿနမတ္တံ၊ န အနတ္တလက္ခဏံ ဝိဘာဝိတံ၊ ဣဓ ပန သရူပတော အနတ္တလက္ခဏံ ဝိဘာဝိတန္တိ အဓိပ္ပါယေန အနုသန္ဓန္တရဘာဝဇောတနာ. ယဒိပိ အနတ္တဘာဝေါ နာမ စတူသုပိ သစ္စေသု လဗ္ဘတေဝ၊ သဗ္ဗေပိ ဟိ ဓမ္မာ အနတ္တာ၊ ဣမေ ပနေတ္ထ ဒွေပိ နယာ သမ္မသနဝသေန ပဝတ္တာတိ ဝုတ္တံ – ‘‘ဒွိန္နံ သစ္စာနံ အနတ္တဘာဝဒဿနတ္ထ’’န္တိ. န ဥပပဇ္ဇတီတိ ဥပပတ္တိသင်္ခါတယုတ္တိယာ န သမေတီတိ အယမေတ္ထ အတ္ထောတိ အာဟ ‘‘န ယုဇ္ဇတီ’’တိ. အတ္တဝါဒိနာ – ‘‘နိစ္စော ဓုဝေါ သဿတော’’တိ အဘိမတော၊ စက္ခုဉ္စ ဥပ္ပါဒဝန္တတာယ အနိစ္စံ၊ ယံ ပစ္စယာယတ္ထဝုတ္တိတာ၊ တသ္မာ ‘‘စက္ခု အတ္တာတိ ယော ဝဒေယျ၊ တံ န ဥပပဇ္ဇတီ’’တိအာဒိ. သက္ကာယဝတ္ထု စက္ခု အနတ္တာ အနိစ္စဘာဝတော သေယျထာပိ ဃဋော၊ စက္ခုံ အနိစ္စံ ပစ္စယာယတ္တဝုတ္တိဘာဝတော သေယျထာပိ ဃဋော၊ စက္ခု ပစ္စယာယတ္တဝုတ္တိ ဥပ္ပါဒါဒိသမ္ဘဝတော သေယျထာပိ ဃဋော. ဝိဂစ္ဆတီတိ ဘင်္ဂုပ္ပတ္တိယာ သဘာဝါဝိဂမေန ဝိဂစ္ဆတိ. တေနာဟ ‘‘နိရုဇ္ဈတီ’’တိ.

၄၂၄. ယသ္မာ ကိလေသဝဋ္ဋမူလကံ ကမ္မဝဋ္ဋံ၊ ကမ္မဝဋ္ဋမူလကဉ္စ ဝိပါကဝဋ္ဋံ. ကိလေသုပ္ပတ္တိ စ တဏှာဒိဂ္ဂါဟပုဗ္ဗိကာ၊ တသ္မာ ‘‘တိဏ္ဏံ ဝါ ဂါဟာနံ ဝသေန ဝဋ္ဋံ ဒဿေတု’’န္တိ အာဟ. ယသ္မာ ပန တဏှာပက္ခိကာ ဓမ္မာ သမုဒယသစ္စံ၊ စက္ခာဒယော ဒုက္ခသစ္စံ၊ တသ္မာ ဝုတ္တံ – ‘‘ဒွိန္နံ သစ္စာနံ ဝသေန ဝဋ္ဋံ ဒဿေတု’’န္တိ. တဏှာမာနဒိဋ္ဌိဂ္ဂါဟာဝ ဝေဒိတဗ္ဗာ သက္ကာယဂါမိနိပဋိပဒါယ အဓိပ္ပေတတ္တာ. ‘‘ဧတံ မမာ’’တိအာဒိနာ ဂဟဏမေဝေတ္ထ အနုပဿနာတိ အာဟ – ‘‘ဂါဟတ္တယဝသေန ပဿတီ’’တိ.

တိဏ္ဏံ ဂါဟာနံ ပဋိပက္ခဝသေနာတိ တဏှာဒိဂ္ဂါဟပဋိပက္ခဘူတာနံ ဒုက္ခာနိစ္စာနတ္တာနုပဿနာနံ ဝသေန၊ တာဟိ ဝါ တိဏ္ဏံ ဂါဟာနံ ပဋိပက္ခဝသေန ဝိနိဝေဌနဝသေန အနုပ္ပါဒနဝသေနာတိ အတ္ထော. ပဋိပက္ခဝသေန ဝိဝဋ္ဋံ ဒဿေတုန္တိ ယောဇနာ. သက္ကာယနိရောဓဂါမိနီ ပဋိပဒါတိ ဧတ္ထ နိရောဓဓမ္မော သရူပေနေဝ ဒဿိတောတိ အာဟ – ‘‘နိရောဓော။ပေ။ ဒဿေတု’’န္တိ. ပဋိသေဓဝစနာနီတိ ပဋိက္ခေပဝစနာနိ.

၄၂၅. တဏှာဒီနံ အနုပါဒိယနဝစနာနိ တဏှာဒိဋ္ဌိဝသေနေဝ ဝုတ္တာနိ တဏှာဒိဋ္ဌီနံယေဝ အဘိနန္ဒနာဒိဝသေန ပဝတ္တိသဗ္ဘာဝတော. အပ္ပဟီနတ္ထော အနုသယတ္ထောတိ အာဟ – ‘‘အနုသေတီတိ အပ္ပဟီနော ဟောတီ’’တိ အရိယမဂ္ဂေန ဟိ အပ္ပဟီနော ထာမဂတော ရာဂါဒိကိလေသော အနုသယော ကာရဏလာဘေ သတိ ဥပ္ပဇ္ဇနာရဟဘာဝတော. ယံ ပနေတ္ထ ဝတ္တဗ္ဗံ၊ တံ ဟေဋ္ဌာ ဝုတ္တမေဝ. ဝဋ္ဋဒုက္ခကိလေသဒုက္ခဿာတိ ဝဋ္ဋဒုက္ခဿ စေဝ ကိလေသဒုက္ခဿ စ. သဥပါဒိသေသနိဗ္ဗာနဉှိ ကိလေသဒုက္ခဿ အန္တကရဏံ၊ အနုပါဒိသေသနိဗ္ဗာနံ ဝဋ္ဋဒုက္ခဿ.

၄၂၆. တေသန္တိ အနုသယာနံ. ပဋိက္ခေပဝသေနာတိ ပဇဟနဝသေန၊ အပ္ပဝတ္တိကရဏဝသေနာတိ အတ္ထော. အဝိဇ္ဇံ ပဇဟိတွာတိ အနဝသေသတော အဝိဇ္ဇံ အပ္ပဝတ္တိဓမ္မတံ အာပါဒေတွာ. ကာမံ ဟေဋ္ဌိမမဂ္ဂဉာဏမ္ပိ အဝိဇ္ဇာပဟာယိနီ ဝိဇ္ဇာ ဧဝ၊ တံ ပန ဉာဏံ အဝိဇ္ဇာယ အနဝသေသပ္ပဟာယကံ န ဟောတိ၊ အဂ္ဂမဂ္ဂဉာဏေ ပန ဥပ္ပန္နေ အဝိဇ္ဇာယ လေသောပိ နာဝသိဿတီတိ တဒေဝ အဝိဇ္ဇာယ ပဟာယကန္တိ အာဟ – ‘‘အရဟတ္တမဂ္ဂဝိဇ္ဇံ ဥပ္ပါဒေတွာ’’တိ.

၄၂၇. သယမေဝ တထာဂတေ အတ္တနော ဗုဒ္ဓါနုဘာဝေန ဒေသေန္တေ သဋ္ဌိ ဘိက္ခူ အရဟတ္တံ ပတ္တာတိ အနစ္ဆရိယမေတံ၊ အထ ကိံ အစ္ဆရိယန္တိ အာဟ ‘‘ဣမ’’န္တိအာဒိ. ကထေန္တေပီတိ ဧတ္ထ ဣတိသဒ္ဒေါ ပကာရတ္ထော၊ ဣမိနာဝ ပကာရေနာတိ အတ္ထော. ပတ္တာ ဧဝါတိ သဋ္ဌိ ဘိက္ခူ အရဟတ္တံ ပတ္တာ ဧဝါတိ ယောဇနာ. ဧတမ္ပိ အနစ္ဆရိယံ၊ သတ္ထု သမ္မုခါ သာဝကာ သမုဒါဂမာ မဟာဘိညာ ပဘိန္နပဋိသမ္ဘိဒါ တထာ တထာ သပ္ပါဋိဟာရိယံ ဓမ္မံ ဒေသေန္တီတိ. တေနာဟ – ‘‘မဟာဘိညပ္ပတ္တာ ဟိ တေ သာဝကာ’’တိ.

မဟာမဏ္ဍပေတိ လောဟပါသာဒဿ ပုရတော ဧဝ မဟာဘိက္ခုသန္နိပါတော ဇာတောတိ တေသံ ပဟောနကဝသေန ကတေ မဟတိ သာဏိမဏ္ဍပေတိ ဝဒန္တိ. တေသုပိ ဌာနေသူတိ တေသု ယထာဝုတ္တမဟာမဏ္ဍပါဒီသု ဌာနေသု. မဟာထေရော အတ္ထီတိ ပဒံ အာနေတွာ သမ္ဗန္ဓိတဗ္ဗံ. ဒေဝတ္ထေရဿ ဂုဏေ သုတွာ ပသန္နမာနသော မဟာထေရော၊ တထာပိ ဝတ္ထသမ္ပတ္တိယာ ပသီဒိတွာ ‘‘တွံ ပန နှာပေဟီ’’တိ အာဟ.

ဟေဋ္ဌာပါသာဒေတိ စ ကလျာဏိယမဟာဝိဟာရေ ဥပေါသထာဂါရေ ဟေဋ္ဌာပါသာဒေ ဧကဒါ ဥပရိပါသာဒေ ဧကဒါ၊ ကထေသီတိ. စူဠနာဂဿ တထာ မဟတီ ပရိသာ ဒေဝတာနုဘာဝေန အဘိညာပါဒနံ အဟောသီတိ ကေစိ. ထေရော ပန မဟိဒ္ဓိကော အဟောသိ၊ တသ္မာ တာဝ မဟတိံ ပရိသံ အဘိညာပေသီတိ အပရေ.

တတော တတောတိ တဿံ တဿံ ဒိသာယံ. ဧကောဝါတိ ဧကစ္စော ဧဝ၊ န ဗဟုသော၊ ကတိပယာဝ ပုထုဇ္ဇနာ အဟေသုန္တိ အတ္ထော. သေသံ ဟေဋ္ဌာ ဝုတ္တနယတ္တာ သုဝိညေယျမေဝ.

ဆဆက္ကသုတ္တဝဏ္ဏနာယ လီနတ္ထပ္ပကာသနာ သမတ္တာ.