၈. ဥဒ္ဒေသဝိဘင်္ဂသုတ္တဝဏ္ဏနာ

၃၁၃. ဒေသေတဗ္ဗဿ အတ္ထဿ ဥဒ္ဒိသနံ ဥဒ္ဒေသော၊ ဝိဘဇနံ ဝိဘင်္ဂေါတိ အာဟ – ‘‘မာတိကဉ္စ ဝိဘဇနဉ္စာ’’တိ တုလေယျာတိအာဒီနိ စတ္တာရိပိ ပဒါနိ ပညာဝေဝစနာနိ. အထ ဝါ တုလေယျာတိ တုလနဘူတာယ ပညာယ တဿ ဓမ္မဿ ပဂ္ဂဟာဒိဝိဓိနာ ပရိတုလေယျ. တီရေယျာတိ တီရဏဘူတာယ ပညာယ တတ္ထ ဉာဏကိရိယာသမာပနဝသေန တီရေယျ. ပရိဂ္ဂဏှေယျာတိ တထာသမာပန္နော အာနိသံသေ အဿာဒအာဒီနဝေ စ ဝိစိနေယျ. ပရိစ္ဆိန္ဒေယျာတိ ပရိစ္ဆိန္ဒဘူတေန ဉာဏေန အတ္ထံ ပရိစ္ဆိန္ဒိတွာ ဇာနေယျ. အာရမ္မဏေသူတိ ရူပါဒိပုထုတ္တာရမ္မဏေသု. နိကန္တိဝသေနာတိ နိကာမနဝသေန အပေက္ခာဝသေန. တိဋ္ဌမာနန္တိ ပဝတ္တမာနံ. ဂေါစရဇ္ဈတ္တေတိ ဈာနာရမ္မဏဘူတေ. တဉှိ ဘာဝနာစိတ္တေနာဘိဘုယျ အဝိဿဇ္ဇိတွာ ဂယှမာနံ အဇ္ဈတ္တံ ဝိယ ဟောတီတိ ‘‘ဂေါစရဇ္ဈတ္တ’’န္တိ ဝုစ္စတိ. ဘာဝနံ အာရဒ္ဓဿ ဘိက္ခုနော ယဒိ ဘာဝနာရမ္မဏေ နိကန္တိ ဥပ္ပဇ္ဇေယျ၊ တာယ နိကန္တိယာ ဥပရိ ဘာဝနံ ဝိဿဇ္ဇေတွာ စိတ္တသံကောစဝသေန သဏ္ဌိတံ နာမ၊ တဒဘာဝေန အသဏ္ဌိတံ နာမ ဟောတီတိ၊ ‘‘အဇ္ဈတ္တံ အသဏ္ဌိတ’’န္တိ ဝုတ္တန္တိ ဒဿေန္တော၊ ‘‘ဂေါစရဇ္ဈတ္တေ နိကန္တိဝသေန အသဏ္ဌိတ’’န္တိ အာဟ. တထာ ဟိ ဝက္ခတိ – ‘‘နိကန္တိဝသေန ဟိ အတိဋ္ဌမာနံ ဟာနဘာဂိယံ န ဟောတိ၊ ဝိသေသဘာဂိယမေဝ ဟောတီ’’တိ. အဂ္ဂဟေတွာတိ ရူပါဒီသု ကိဉ္စိ တဏှာဒိဂ္ဂါဟဝသေန အဂ္ဂဟေတွာ. တထာ အဂ္ဂဟဏေနေဝ ဟိ တဏှာပရိတာသာဒိဝသေန န ပရိတဿေယျ. အဝသေသဿ စ ဒုက္ခဿာတိ သောကာဒိဒုက္ခဿ. အဝသေသဿ စ ဒုက္ခဿာတိ ဝါ ဇာတိဇရာမရဏသီသေန ဝိပါကဒုက္ခဿ ဂဟိတတ္တာ ကိလေသဒုက္ခဿ စေဝ သံသာရဒုက္ခဿ စာတိ အတ္ထော.

၃၁၆. ရူပမေဝ ကိလေသုပ္ပတ္တိယာ ကာရဏဘာဝတော ရူပနိမိတ္တံ. ရာဂါဒိဝသေန တံ အနုဓာဝတီတိ ရူပနိမိတ္တာနုသာရီ.

၃၁၈. နိကန္တိဝသေန အသဏ္ဌိတန္တိ အပေက္ခာဝသေန သဏ္ဌိတံ နိကန္တိံ ပဟာယ ပဝတ္တမာနံ ဥပရိ ဝိသေသာဝဟတောတိ. တေနာဟ ‘‘နိကန္တိဝသေန ဟီ’’တိအာဒိ.

၃၂၀. အဂ္ဂဟေတွာ အပရိတဿနာတိ ပဉ္စုပါဒါနက္ခန္ဓေ၊ ‘‘ဧတံ မမာ’’တိအာဒိနာ တဏှာဒိဂ္ဂါဟဝသေန ဥပါဒိယိတွာ တဏှာပရိတာသာဒိဝသေန ပရိတဿနာ၊ ဝုတ္တဝိပရိယာယေန အဂ္ဂဟေတွာ အပရိတဿနာ ဝေဒိတဗ္ဗာ. ကထံ ပနေသာ အနုပါဒါပရိတဿနာ ဟောတီတိ မဟာထေရဿ အဓိပ္ပါယံ ဝိဝရိတုံ စောဒနံ သမုဋ္ဌပေတိ? ဥပါဒါတဗ္ဗဿ အဘာဝတောတိ တဿ အနုပါဒါပရိတဿနာဘာဝေ ကာရဏဝစနံ. ယဒိ ဟီတိအာဒိ တဿ သမတ္ထနံ. ဥပါဒါပရိတဿနာဝ အဿ တထာ ဥပါဒါတဗ္ဗဿ တထေဝ ဥပါဒိန္နတ္တာ. ဧဝန္တိ နိစ္စာဒိအာကာရေန. ဥပါဒိန္နာပီတိ ဂဟိတပရာမဋ္ဌာပိ. အနုပါဒိန္နာဝ ဟောန္တိ အယောနိသော ဂဟိတတ္တာ၊ ဝိညူသု နိဿာယ ဇာနိတဗ္ဗတ္တာ စ. ဒိဋ္ဌိဝသေနာတိ မိစ္ဆာဒိဋ္ဌိယာ ဂဟဏာကာရဝသေန၊ တဿ ပန အယထာဘူတဂါဟိတာယ ပရမတ္ထတော စ အဘာဝတော. အတ္ထတောတိ ပရမတ္ထတော. အနုပါဒါပရိတဿနာယေဝ နာမ ဟောတိ ဥပါဒါတဗ္ဗာကာရဿ အဘာဝေန တံ အနုပါဒိယိတွာ ဧဝ ပရိတဿနာတိ ကတွာ.

ပရိဝတ္တတီတိ န တဒေဝ ရူပံ အညထာ ပဝတ္တံ ပရိဝတ္တတိ၊ အထ ခေါ ပကတိဇဟနေန သဘာဝဝိဂမေန နဿတိ ဘိဇ္ဇတိ. ဝိပရိဏတန္တိ အညထတ္တံ ဂတံ ဝိနဋ္ဌံ. ကမ္မဝိညာဏန္တိ အဘိသင်္ခါရဝိညာဏံ. ‘‘ရူပံ အတ္တာ’’တိအာဒိ မိစ္ဆာဂါဟဝသေန ဝိညာဏဿ ရူပဘေဒေန ဝုတ္တဿ ဘေဒါနုပရိဝတ္တိ ဟောတိ. ဝိပရိဏာမံ အနုဂန္တွာ ဝိပရိဝတ္တနတံ အာရဗ္ဘ ပဝတ္တံ ဝိပရိဏာမာနုပရိဝတ္တံ၊ တတော သမုပ္ပန္နာ ပရိတဿနာ ဝိပရိဏာမာနုပရိဝတ္တဇာ ပရိတဿနာတိ ဒဿေန္တော အာဟ – ‘‘ဝိပရိဏာမဿ။ပေ။ ပရိတဿနာ’’တိ. အကုသလဓမ္မသမုပ္ပါဒါ စာတိ၊ ‘‘ယံ အဟု ဝတ မေ၊ တံ ဝတ မေ နတ္ထီ’’တိအာဒိနာ ပဝတ္တာ အကုသလစိတ္တုပ္ပါဒဓမ္မာ. ခေပေတွာတိ ပဝတ္တိတုံ အပ္ပဒါနဝသေန အနုပ္ပတ္တိနိမိတ္တတာယ ခေပေတွာ. ဘယတာသေနာတိ ဘာယနဝသေနပိ စိတ္တုတြာသေန. တဏှာတာသေနာတိ တဿနေန. သဝိဃာတောတိ စိတ္တဝိဃာတနဝိဃာတေန သဝိဃာတော. တတော ဧဝ စေတောဒုက္ခေန သဒုက္ခော. မဏိကရဏ္ဍကသညာယာတိ ရိတ္တကရဏ္ဍံယေဝ မဏိပရိပုဏ္ဏကရဏ္ဍောတိ ဥပ္ပန္နသညာယ. အဂ္ဂဟေတွာ ပရိတဿနာတိ ဂဟေတဗ္ဗဿ အဘာဝေန ဂဟဏမ္ပိ အဝိဇ္ဇမာနပက္ခိယမေဝါတိ အဂ္ဂဟေတွာ ပရိတဿနာ နာမ ဟောတိ.

၃၂၁. ကမ္မဝိညာဏမေဝ နတ္ထိ သတိ ကမ္မဝိညာဏေ ရူပဘေဒါနုပရိဝတ္တိ သိယာတိ ကမ္မဝိညာဏာဘာဝဒဿနမုခေန ခီဏာသဝဿ သဗ္ဗသော ကိလေသာဘာဝံ ဒဿေတိ. သေသံ သုဝိညေယျမေဝ.

ဥဒ္ဒေသဝိဘင်္ဂသုတ္တဝဏ္ဏနာယ လီနတ္ထပ္ပကာသနာ သမတ္တာ.