၆. ဣသိဂိလိသုတ္တဝဏ္ဏနာ

၁၃၃. သမညာယတိ ဧတာယာတိ သမညာ၊ နာမန္တိ အတ္ထော. အယမယံ နာမာတိ ပညာပေန္တိ ဧတာယ၊ တထာပညာပနမတ္တန္တိ ဝါ ပညတ္တိ၊ နာမမေဝ. တေနာဟ ‘‘ပုရိမပဒဿေဝ ဝေဝစန’’န္တိ. သေသေသုပီတိ ‘‘ပဏ္ဍဝဿ ပဗ္ဗတဿာ’’တိအာဒီသု တီသု ဝါရေသုပိ.

သမုဋ္ဌာနံ တာဝ သုတ္တဿ ကထေတွာ အတ္ထသံဝဏ္ဏနံ ကာတုံ ‘‘တဒါ ကိရာ’’တိအာဒိ ဝုတ္တံ. န ပဗ္ဗတေဟိ အတ္ထောတိ န ဘဂဝတော ပဗ္ဗတေဟိ ကထိတေဟိ အတ္ထော အတ္ထိ. ဣသိဂိလိဘာဝေါတိ ဣသိဂိလိနာမတာ. ဣတီတိ ဣမိနာ ကာရဏေန၊ ဣမံ အဋ္ဌုပ္ပတ္တိံ အဝေက္ခန္တောတိ အတ္ထော.

စေတိယဂဗ္ဘေတိ စေတိယဃရေ စေတိယဿ အဗ္ဘန္တရေ. ယမကမဟာဒွါရန္တိ ယမကကဝါဋယုတ္တံ မဟန္တံ ဒွါရံ. ဒွေဓာ ကတွာတိ ပဗ္ဗတဿ အဗ္ဘန္တရေ မဏ္ဍပသင်္ခေပေန လေဏံ နိမ္မိနိတွာ ဒွေဓာ ကတွာ တဒါ တေ တတ္ထ ဝသိံသု.

ဝသိတကာလဉ္စ ကထေန္တော တေသံ မာတုယာ ယာဝ တတိယဘဝတော ပဋ္ဌာယ သမုဒါဂမံ ဒဿေတုံ၊ ‘‘အတီတေ ကိရာ’’တိအာဒိ ဝုတ္တံ. ပတ္ထေသီတိ တဿာ ကိရ ခေတ္တကုဋိယာ ဝီဟယော ဘဇ္ဇန္တိယာ တတ္ထ မဟာကရဉ္ဇပုပ္ဖပ္ပမာဏာ မဟန္တာ မနောဟရာ ပဉ္စသတမတ္တာ လာဇာ ဇာယိံသု. သာ တာ ဂဟေတွာ မဟန္တေ ပဒုမိနိပတ္တေ ဌပေသိ. တသ္မိဉ္စ သမယေ ဧကော ပစ္စေကဗုဒ္ဓေါ တဿာ အနုဂ္ဂဟတ္ထံ အဝိဒူရေ ခေတ္တပါဠိယာ ဂစ္ဆတိ. သာ တံ ဒိသွာ ပသန္နမာနသာ သုပုပ္ဖိတံ မဟန္တံ ဧကံ ပဒုမံ ဂဟေတွာ တတ္ထ လာဇေ ပက္ခိပိတွာ ပစ္စေကဗုဒ္ဓံ ဥပသင်္ကမိတွာ ပဉ္စပတိဋ္ဌိတေန ဝန္ဒိတွာ၊ ‘‘ဣမဿ၊ ဘန္တေ၊ ပုညဿ အာနုဘာဝေန အာနုဘာဝသမ္ပန္နေ ပဉ္စသတပုတ္တေ လဘေယျ’’န္တိ ပဉ္စ ပုတ္တသတာနိ ပတ္ထေသိ. တသ္မိံယေဝ ခဏေတိ ယဒါ သာ ယထာဝုတ္တံ ပတ္ထနံ ပဋ္ဌပေသိ၊ တသ္မိံယေဝ ခဏေ ပဉ္စသတာ မိဂလုဒ္ဒကာ သမ္ဘတသမ္ဘာရာ ပရိပက္ကပစ္စေကဗောဓိဉာဏာ တဿေဝ ပစ္စေကဗုဒ္ဓဿ မဓုရမံသံ ဒတွာ၊ ‘‘ဧတိဿာ ပုတ္တာ ဘဝေယျာမာ’’တိ ပတ္ထယိံသု. အတီတာသု အနေကဇာတီသု တဿာ ပုတ္တဘာဝေန အာဂတတ္တာ တထာ တေသံ အဟောသီတိ ဝဒန္တိ. ပါဒုဒ္ဓါရေတိ ပါဒုဒ္ဓါရေ ပါဒုဒ္ဓါရေ. ပါဒုဒ္ဓါရသီသေန စေတ္ထ နိက္ခိပနံ အာဟ.

ဂဗ္ဘမလံ နိဿာယာတိ ဗဟိ နိက္ခန္တံ ဂဗ္ဘမလံ နိဿယံ ကတွာ သံသေဒဇဘာဝေန နိဗ္ဗတ္တာ. ဩပပါတိကဘာဝေနာတိ ကေစိ. ခယဝယံ ပဋ္ဌပေတွာတိ ဝိပဿနံ အာရဘိတွာ. ဝိပဿနာတိ အနိစ္စာနုပဿနာပုဗ္ဗိကာ သပ္ပစ္စယနာမရူပဒဿနပုဗ္ဗိကာ စ၊ သင်္ခါရေ သမ္မသန္တဿ အနိစ္စလက္ခဏေ ဒိဋ္ဌေ၊ ‘‘ယဒနိစ္စံ တံ ဒုက္ခံ၊ ယံ ဒုက္ခံ တဒနတ္တာ’’တိ သေသလက္ခဏာနိ သုဝိညေယျာနေဝ ဟောန္တိ. ပစ္စေကဗောဓိဉာဏံ နိဗ္ဗတ္တယိံသူတိ ဒွေ အသင်္ချေယျာနိ ကပ္ပါနံ သတသဟဿဉ္စ ပစ္စေကဗောဓိပါရမိတာယ ပရိနိပ္ဖန္နတ္တာ ဉာဏဿ ပရိပါကတ္တာ ဝုတ္တနယေန သယမေဝ ဝိပဿနံ ပဝတ္တေတွာ မတ္ထကံ ပါပေတွာ ပစ္စေကဗောဓိဉာဏံ အဓိဂစ္ဆိံသု. သဗ္ဗေပိ တေ တံယေဝ ဂါထံ အဘာသိံသူတိ အာဟ – ‘‘အယံ တေသံ ဗျာကရဏဂါထာ အဟောသီ’’တိ.

သရောရုဟန္တိ သရသိ ဇာတံ. ပဒုမပလာသပတ္တဇန္တိ ခုဒ္ဒကမဟန္တေဟိ ကမလဒလေဟိ သဟဇာတံ. ခုဒ္ဒကမဟန္တကမလဒလသင်္ခါတာနိ ဝါ ပဒုမပလာသပတ္တာနိ ဧတ္ထ သန္တီတိ ပဒုမပလာသပတ္တံ၊ ပဒုမဂစ္ဆံ. တတ္ထ ဇာတန္တိ ပဒုမပလာသပတ္တဇံ. သုပုပ္ဖိတန္တိ သုဋ္ဌု ပုပ္ဖိတံ သမ္မာ ဝိကသိတံ. ဘမရဂဏာနုစိဏ္ဏန္တိ ဘမရဂဏေဟိ အနုကုလဉ္စေဝ အနုပရိဗ္ဘမိတဉ္စ. အနိစ္စတာယုပဂတန္တိ ခဏေ ခဏေ ဝဏ္ဏဘေဒါဒိဝသေန အနိစ္စတာယ ဥပဂတံ. ဝိဒိတွာတိ ဝိပဿနာပညာသဟိတာယ မဂ္ဂပညာယ ဇာနိတွာ. ဧကော စရေတိ တသ္မာ အညောပိ မာဒိသော ဟောတုကာမော ဧဝံ ပဋိပဇ္ဇိတွာ ဧကော စရေ ခဂ္ဂဝိသာဏကပ္ပေါတိ.

၁၃၅. သတိသာရသီလသာရာဒိသမန္နာဂမနေန သတ္တေသု သာရဘူတာ. သဗ္ဗသော ဝဋ္ဋဒုက္ခဿ ဝိဂတတ္တာ နိဒ္ဒုက္ခာ. သမုစ္ဆိန္နတဏှတာယ နိတ္တဏှာ. မာနစ္ဆိဒေါတိ ထုတိဝစနံ.

ဧတေသံ ဧကနာမကာယေဝါတိ ဧတေသံ အာဂတာနံ ပစ္စေကဗုဒ္ဓါနံ ပါဠိယံ အနာဂတာ အညေ ပစ္စေကဗုဒ္ဓါ သမာနနာမကာ ဧဝ. ဝုတ္တမေဝတ္ထံ ပါကဋီကရဏတ္ထံ ‘‘ဣမေသု ဟီ’’တိအာဒိ ဝုတ္တံ. ဝိသုံ ဝိသုံ အဝတွာတိ ပစ္စေကံ သရူပတော အဝတွာ. အညေ စာတိ အသာဓာရဏတ္တာ အာဟ. သေသံ သုဝိညေယျမေဝ.

ဣသိဂိလိသုတ္တဝဏ္ဏနာယ လီနတ္ထပ္ပကာသနာ သမတ္တာ.