၁. ပါရာဇိကနိဒ္ဒေသဝဏ္ဏနာ

၁. ဣဒါနိ သဗ္ဗသိက္ခာနံ ပန မူလဘူတတ္တာ အဓိသီလသိက္ခာဝ ပဌမံ ဝုတ္တာ၊ တတြာပိ မဟာသာဝဇ္ဇတ္တာ၊ မူလစ္ဆေဇ္ဇဝသေန ပဝတ္တနတော စ သဗ္ဗပဌမံ ပါရာဇိကံ ဇာနိတဗ္ဗန္တိ ဒဿေန္တော ‘‘သံ နိမိတ္တ’’န္တျာဒိမာဟ. တတ္ထ မဂ္ဂတ္တယေ သံ နိမိတ္တံ ပဝေသန္တော ဘိက္ခု စုတောတိ အတ္ထော. သံ နိမိတ္တန္တိ အတ္တနော အင်္ဂဇာတံ၊ သဗ္ဗန္တိမေန ပရိစ္ဆေဒေန ဧကတိလဗီဇမတ္တမ္ပိ အတ္တနော အင်္ဂဇာတန္တိ ဝုတ္တံ ဟောတိ. ဘိက္ခူတိ အနိက္ခိတ္တသိက္ခော. မဂ္ဂတ္တယေတိ ဧတ္ထ မနုဿာမနုဿတိရစ္ဆာနဂတာနံ ဝသေန တိဿော ဣတ္ထိယော၊ တယော ဥဘတောဗျဉ္ဇနကာ၊ တယော ပဏ္ဍကာ၊ တယော ပုရိသာတိ ပါရာဇိကဝတ္ထုဘူတာနံ နိမိတ္တာနံ နိဿယာ ဒွါဒသ သတ္တာ ဟောန္တိ. တေသံ ဝစ္စပဿာဝမုခမဂ္ဂဝသေန တယော မဂ္ဂါ. တတ္ထ မနုဿိတ္ထိယာ တယော၊ အမနုဿိတ္ထိယာ တယော၊ တိရစ္ဆာနဂတိတ္ထိယာ တယောတိ နဝ၊ တထာ မနုဿုဘတောဗျဉ္ဇနကာဒီနံ. မနုဿပဏ္ဍကာဒီနံ ပန ဝစ္စမုခမဂ္ဂဝသေန ဒွေ ဒွေတိ ဆ၊ တထာ မနုဿပုရိသာဒီနန္တိ သဗ္ဗေသံ ဝသေန တိံသ မဂ္ဂါ ဟောန္တိ. တေ သဗ္ဗေ ပရိဂ္ဂဟေတွာ ဣဓ ‘‘မဂ္ဂတ္တယေ’’တိ ဝုတ္တံ၊ တသ္မိံ မဂ္ဂတ္တယေ၊ ဒွါဒသန္နံ သတ္တာနံ တီသု မဂ္ဂေသု ယတ္ထ ကတ္ထစိ မဂ္ဂေတိ အတ္ထော. စုတောတိ သက္ကတ္တာ ဝါ ဗြဟ္မတ္တာ ဝါ စုတသတ္တော ဝိယ သာသနတော စုတော ဟောတိ၊ ပါရာဇိကော ဟောတီတိ အတ္ထော.

ဣဒါနိ ပဝေသနံ နာမ န ကေဝလံ အတ္တုပက္ကမေနေဝ ဟောတိ၊ ပရူပက္ကမေနာပိ ဟောတိ၊ တတ္ထာပိ သေဝနစိတ္တေ သတိ ပါရာဇိကော ဟောတီတိ ဒဿနတ္ထံ ‘‘ပဝေသနာ’’တျာဒိ ဝုတ္တံ. တဿတ္ထော – ယော ဘိက္ခု ပဝေသနဋ္ဌိတဥဒ္ဓရဏပဝိဋ္ဌက္ခဏေသု အညတရံ ခဏံ စေပိ သာဒိယံ သာဒိယန္တော သစေပိ တသ္မိံ ခဏေ သေဝနစိတ္တံ ဥပဋ္ဌာပေန္တော၊ စုတော ပါရာဇိကော ဟောတိ. ယော ပန သဗ္ဗသော အသာဒိယန္တော အာသီဝိသမုခံ အင်္ဂါရကာသုံ ပဝိဋ္ဌံ ဝိယ စ မညတိ၊ သော နိပ္ပရာဓော ဟောတိ. ဧတ္ထ ပန ဌိတံ နာမ သုက္ကဝိဿဋ္ဌိသမယပ္ပတ္တံ. ပဌမပါရာဇိကံ.

၂-၇. ဣဒါနိ ဒုတိယံ ဒဿေတုံ ‘‘အဒိန္နံ မာနုသံ ဘဏ္ဍ’’န္တျာဒိမာဟ. တတ္ထ ယော ဘိက္ခု အဒိန္နံ မာနုသံ ဂရုကံ ဘဏ္ဍံ ပဉ္စဝီသာဝဟာရေသု ယေန ကေနစိ အဝဟာရေန အာဒိယန္တော စုတော ဘဝေတိ သမ္ဗန္ဓော. အဒိန္နန္တိ ယံ ကိဉ္စိ ပရပရိဂ္ဂဟိတံ သဿာမိကံ ဘဏ္ဍံ၊ တံ တေဟိ သာမိကေဟိ ကာယေန ဝါ ဝါစာယ ဝါ န ဒိန္နန္တိ အဒိန္နံ၊ အနိဿဋ္ဌံ အပရိစ္စတ္တံ ရက္ခိတံ ဂေါပိတံ မမာယိတံ ပရပရိဂ္ဂဟိတံ. မနုဿဿ ဣဒန္တိ မာနုသံ၊ မနုဿသန္တကံ၊ ‘‘ဘဏ္ဍ’’န္တိမိနာ တုလျာဓိကရဏံ. ထေယျာယေကေနာတိ ထေယျာယ ဧကေန၊ ဧကေန အဝဟာရေနာတိ အတ္ထော. လိင်္ဂဘေဒံ ကတွာ ဝုတ္တံ. ‘‘ထေယျာ ကေနစီ’’တိ ဝါ ပါဌော. တတ္ထ ထေနောတိ စောရော၊ ထေနဿ ဘာဝေါ ထေယျာ၊ ကရဏတ္ထေ စေတံ ပစ္စတ္တဝစနံ၊ တသ္မာ ကေနစိ ထေယျေန အဝဟာရေနာတိ အတ္ထော. အာဒိယန္တိ အာဒိယန္တော ဂဏှန္တော. ပဉ္စဝီသာဝဟာရေသူတိ ပဉ္စပဉ္စကေ သမောဓာနေတွာ ပဉ္စဝီသတိ အဝဟာရာ. တတ္ထ ပဉ္စပဉ္စကာနိ နာမ နာနာဘဏ္ဍပဉ္စကံ ဧကဘဏ္ဍပဉ္စကံ သာဟတ္ထိကပဉ္စကံ ပုဗ္ဗပ္ပယောဂပဉ္စကံ ထေယျာဝဟာရပဉ္စကန္တိ.

တတ္ထ သဝိညာဏကာဝိညာဏကမိဿကဘဏ္ဍဝသေန နာနာဘဏ္ဍပဉ္စကံ၊ သဝိညာဏကဘဏ္ဍဝသေန ဧကဘဏ္ဍပဉ္စကံ. တတ္ထ နာနာဘဏ္ဍဝသေန တာဝ ဧဝံ ဝေဒိတဗ္ဗော – ယော အာရာမံ အဘိယုဉ္ဇတိ၊ အာပတ္တိ ဒုက္ကဋဿ. သာမိကဿ ဝိမတိံ ဥပ္ပါဒေတိ၊ အာပတ္တိ ထုလ္လစ္စယဿ. သာမိကော ‘‘န မယှံ ဘဝိဿတီ’’တိ ဓုရံ နိက္ခိပတိ၊ အာပတ္တိ ပါရာဇိကဿ. အညဿ ဘဏ္ဍံ ဟရန္တော သီသေ ဘာရံ ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ခန္ဓံ ဩရောပေတိ၊ အာပတ္တိ ပါရာဇိကဿ. ဥပနိက္ခိတ္တံ ဘဏ္ဍံ ‘‘ဒေဟိ မေ ဘဏ္ဍ’’န္တိ ဝုစ္စမာနော ‘‘နာဟံ ဂဏှာမီ’’တိ ဘဏတိ၊ အာပတ္တိ ဒုက္ကဋဿ. သာမိကဿ ဝိမတိံ ဥပ္ပါဒေတိ၊ အာပတ္တိ ထုလ္လစ္စယဿ. သာမိကော ‘‘န မယှံ ဒဿတီ’’တိ ဓုရံ နိက္ခိပတိ၊ အာပတ္တိ ပါရာဇိကဿ. ‘‘သဟဘဏ္ဍဟာရကံ နေဿာမီ’’တိ ပဌမံ ပါဒံ သင်္ကာမေတိ၊ အာပတ္တိ ထုလ္လစ္စယဿ. ဒုတိယံ ပါဒံ သင်္ကာမေတိ၊ အာပတ္တိ ပါရာဇိကဿ. ထလဋ္ဌံ ဘဏ္ဍံ ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ. အယမေတ္ထ နာနာဘဏ္ဍဝသေန ယောဇနာ. ဧကဘဏ္ဍဝသေန ပန သဿာမိကံ ဒါသံ ဝါ တိရစ္ဆာနံ ဝါ ယထာဝုတ္တေန အဘိယောဂါဒိနာ နယေန အာဒိယတိ ဝါ ဟရတိ ဝါ အဝဟရတိ ဝါ ဣရိယာပထံ ကောပေတိ ဝါ ဌာနာ စာဝေတိ ဝါတိ. အယမေတ္ထ ဧကဘဏ္ဍဝသေန ယောဇနာ.

ပဉ္စ အဝဟာရာ သာဟတ္ထိကော အာဏတ္တိကော နိဿဂ္ဂိယော အတ္ထသာဓကော ဓုရနိက္ခေပေါတိ. တတ္ထ သာဟတ္ထိကော နာမ ပရဿ ဘဏ္ဍံ သဟတ္ထာ အဝဟရတိ. အာဏတ္တိကော နာမ ‘‘အသုကဿ ဘဏ္ဍံ အဝဟရာ’’တိ အညံ အာဏာပေတိ. နိဿဂ္ဂိယော နာမ အန္တောသုင်္ကဃာတေ ဌိတော ဗဟိသုင်္ကဃာတံ ပါတေတိ၊ အာပတ္တိ ပါရာဇိကဿ. အတ္ထသာဓကော နာမ ‘‘အသုကံ ဘဏ္ဍံ ယဒါ သက္ကောသိ၊ တဒါ အဝဟရာ’’တိ အာဏာပေတိ. တတ္ထ သစေ ပရော အနန္တရာယိကော ဟုတွာ တံ အဝဟရတိ၊ အာဏာပကော အာဏတ္တိက္ခဏေယေဝ ပါရာဇိကော ဟောတိ၊ အဝဟာရကော ပန အဝဟဋကာလေ၊ အယံ အတ္ထသာဓကော. ဓုရနိက္ခေပေါ ပန ဥပနိက္ခိတ္တဘဏ္ဍဝသေန ဝေဒိတဗ္ဗောတိ ဣဒံ သာဟတ္ထိကပဉ္စကံ.

အပရေပိ ပဉ္စ အဝဟာရာ ပုဗ္ဗပ္ပယောဂေါ သဟပ္ပယောဂေါ သံဝိဓာဝဟာရော သင်္ကေတကမ္မံ နိမိတ္တကမ္မန္တိ. တတ္ထ အာဏတ္တိဝသေန ပုဗ္ဗပ္ပယောဂေါ ဝေဒိတဗ္ဗော၊ ဌာနာစာဝနဝသေန သဟပ္ပယောဂေါ. သံဝိဓာဝဟာရော နာမ သမ္ဗဟုလာ ဘိက္ခူ ‘‘အမုကံ နာမ ဂေဟံ ဂန္တွာ၊ ဆဒနံ ဝါ ဘိန္ဒိတွာ၊ သန္ဓိံ ဝါ ဆိန္ဒိတွာ ဘဏ္ဍံ ဟရိဿာမာ’’တိ သံဝိဒဟိတွာ ဂစ္ဆန္တိ၊ တေသု ဧကော ဘဏ္ဍံ အဝဟရတိ၊ တဿုဒ္ဓါရေ သဗ္ဗေသံ ပါရာဇိကံ. သင်္ကေတကမ္မံ နာမ သဉ္ဇာနနကမ္မံ ကာလပရိစ္ဆေဒဝသေန သညာကရဏံ. ဧတ္ထ စ ‘‘ပုရေဘတ္တံ အဝဟရာ’’တိ ဝုတ္တေ အဇ္ဇ ဝါ ပုရေဘတ္တံ အဝဟရတု၊ သွေ ဝါ အနာဂတေ သံဝစ္ဆရေ ဝါ၊ နတ္ထိ ဝိသင်္ကေတော၊ သင်္ကေတကာရကဿ အာဏတ္တိက္ခဏေ၊ ဣတရဿ ဌာနာ စာဝနေတိ ဧဝံ အာပတ္တိ ဥဘိန္နံ ပါရာဇိကဿ. နိမိတ္တကမ္မံ နာမ သညုပ္ပါဒနတ္ထံ ကဿစိ နိမိတ္တဿ ကရဏံ အက္ခိနိခဏနဟတ္ထာလင်္ဃနပါဏိပ္ပဟာရအင်္ဂုလိဖောဋနဂီဝုန္နာမနဥက္ကာသနာဒိနာ အနေကပ္ပကာရံ. အဝဟာရကော အာဏာပကေန ယံ နိမိတ္တသညံ ကတွာ ဝုတ္တံ၊ တံ ‘‘ဧတ’’န္တိ မညမာနော တမေဝ အဝဟရတိ၊ ဥဘိန္နံ ပါရာဇိကံ. ယံ ‘‘အဝဟရာ’’တိ ဝုတ္တံ၊ တံ ‘‘ဧတ’’န္တိ မညမာနော အညံ တသ္မိံယေဝ ဌာနေ ဌပိတံ အဝဟရတိ၊ မူလဋ္ဌဿ အနာပတ္တိ. ဣဒံ ပုဗ္ဗပ္ပယောဂပဉ္စကံ.

အပရေပိ ပဉ္စ အဝဟာရာ ထေယျာဝဟာရော ပသယှာဝဟာရော ပရိကပ္ပါဝဟာရော ပဋိစ္ဆန္နာဝဟာရော ကုသာဝဟာရောတိ. တတ္ထ ယော ကူဋမာနကူဋကဟာပဏာဒီဟိ ဝဉ္စေတွာ ဂဏှာတိ၊ တဿေဝံ ဂဏှတော အဝဟာရော ထေယျာဝဟာရော. ယော သန္တဇ္ဇေတွာ သယံ ဒဿေတွာ တေသံ သန္တကံ ဂဏှာတိ၊ ယော ဝါ အတ္တနော ပတ္တဗလိတော စ အဓိကံ ဗလက္ကာရေန ဂဏှာတိ ရာဇရာဇမဟာမတ္တာဒယော ဝိယ၊ တဿေဝံ ဂဏှတော အဝဟာရော ပသယှာဝဟာရော. ပရိကပ္ပေတွာ ဂဏှတော ပနာဝဟာရော ပရိကပ္ပါဝဟာရော. သော ဒုဝိဓော ဘဏ္ဍောကာသပရိကပ္ပဝသေန. တတြ ယော ‘‘သာဋကော စေ၊ ဂဏှိဿာမိ၊ သုတ္တံ စေ၊ န ဂဏှိဿာမီ’’တိ ပရိကပ္ပေတွာ အန္ဓကာရေ ပသိဗ္ဗကံ ဂဏှာတိ၊ တတြ သာဋကော စေ၊ ဥဒ္ဓါရေယေဝ ပါရာဇိကံ၊ သုတ္တံ စေ ဟောတိ၊ ရက္ခတိ. အယံ ဘဏ္ဍပရိကပ္ပေါ နာမ. ယော ဌာနံ ပရိကပ္ပေတွာ ဘဏ္ဍံ ဂဏှာတိ၊ တဿ တံ ပရိကပ္ပိတပရိစ္ဆေဒံ အတိက္ကန္တမတ္တေ ပါရာဇိကံ. အယံ ဩကာသပရိကပ္ပေါ နာမ. ဧဝမိမေသံ ဒွိန္နံ ပရိကပ္ပါနံ ဝသေန ပရိကပ္ပေတွာ ဂဏှတော အဝဟာရော ပရိကပ္ပါဝဟာရော. ပဋိစ္ဆာဒေတွာ ပရဿ ဘဏ္ဍံ ဂဏှတော အဝဟာရော ပဋိစ္ဆန္နာဝဟာရော နာမ. ကုသံ သင်္ကာမေတွာ အဝဟရဏံ ကုသာဝဟာရော. ယော ကုသံ ပါတေတွာ စီဝရေ ဘာဇိယမာနေ အတ္တနော ကောဋ္ဌာသဿ သမီပေ ဌိတံ အပ္ပဂ္ဃတရံ ဝါ မဟဂ္ဃတရံ ဝါ သမသမံ ဝါ ပရဿ ကောဋ္ဌာသံ ဒိသွာ သစေ ပဌမတရံ ပရကောဋ္ဌာသတော ကုသဒဏ္ဍကံ ဥဒ္ဓရတိ၊ အတ္တနော ကောဋ္ဌာသေ ပါတေတုကာမတာယ ဥဒ္ဓါရေ ရက္ခတိ၊ ပါတနေပိ ရက္ခတိ၊ အတ္တနော ကောဋ္ဌာသတော ပန ကုသဒဏ္ဍံ ဥဒ္ဓရတိ၊ ဥဒ္ဓါရေ ရက္ခတိ၊ တံ ဥဒ္ဓရိတွာ ပရကောဋ္ဌာသေ ပါတေန္တဿ ဟတ္ထတော မုတ္တမတ္တေ ပါရာဇိကံ. အယံ ကုသာဝဟာရော နာမာတိ ဣမေသု ပဉ္စဝီသာဝဟာရေသု ယေန ကေနစိ အဝဟာရေန ဂဏှန္တော ပါရာဇိကော ဘဝေတိ အတ္ထော.

ဂရုကန္တိ ပဉ္စမာသကံ. ဝီသတိမာသကော ဟိ ကဟာပဏော၊ ကဟာပဏဿ စတုတ္ထော ဘာဂေါ ပါဒေါ နာမ၊ တသ္မာ ပဉ္စမာသကံ ဝါ ပါဒံ ဝါ ဂရုကန္တိ ဝေဒိတဗ္ဗံ. တတ္ထ ‘‘စတ္တာရော ဝီဟယော ဂုဉ္ဇာ၊ ဒွေ ဂုဉ္ဇာ မာသကော ဘဝေ’’တိ ဝစနတော ဝီဟိဝသေန စတ္တာလီသ ဝီဟယော ဒသ ဂုဉ္ဇာ ပဉ္စမာသကောတိ ဝေဒိတဗ္ဗော. ယံ ပန သာမဏေရသိက္ခာယံ ‘‘ဝီသတိဝီဟီ’’တိ ဝုတ္တံ၊ တံ နေဝ ပါဠိယံ၊ န အဋ္ဌကထာယံ အတ္ထိ၊ ဝီမံသိတဗ္ဗမေတံ. ဒုတိယပါရာဇိကံ.

၈. ဣဒါနိ တတိယံ ဒဿေတုံ ‘‘မနုဿပါဏံ ပါဏော’’တျာဒိ ဝုတ္တံ. တတ္ထ ယော ဘိက္ခု ‘‘မနုဿပါဏော’’ ဣတိ ဇာနန္တော ဝဓကစိတ္တေန မနုဿပါဏံ ဇီဝိတာ ဝိယောဇေတိ၊ သော ဘိက္ခု သာသနာ ပါရာဇိကော ဟောတီတိ သမုဒါယတ္ထော.

မနုဿပါဏန္တိ မာတုကုစ္ဆိသ္မိံ ပဋိသန္ဓိစိတ္တေန သဟုပ္ပန္နံ အတိပရိတ္တံ ကလလရူပံ အာဒိံ ကတွာ ပကတိယာ ဝီသဝဿသတာယုကဿ သတ္တဿ ယာဝ မရဏကာလာ ဧတ္ထန္တရေ အနုပုဗ္ဗေန ဝုဒ္ဓိပ္ပတ္တော အတ္တဘာဝေါ၊ ဧသော မနုဿပါဏော နာမ၊ ဧဝရူပံ မနုဿပါဏန္တိ အတ္ထော. ပါဏောတိ ဇာနန္တိ ‘‘ပါဏော’’ ဣတိ ဇာနန္တော ‘‘တံ ဇီဝိတာ ဝေါရောပေမီ’’တိ ဇာနန္တော. ဝဓကစေတသာတိ ဝဓကစိတ္တေန၊ ဣတ္ထမ္ဘူတေ ကရဏဝစနံ၊ ဝဓကစိတ္တော ဟုတွာ မရဏာဓိပ္ပါယော ဟုတွာတိ ဝုတ္တံ ဟောတိ. ဇီဝိတာတိ ဇီဝိတိန္ဒြိယတော. ယောတိ အနိယမဝစနံ. သောတိ ဧတေန နိယမနံ ဝေဒိတဗ္ဗံ. ဝိယောဇေတီတိ ဝုတ္တပ္ပကာရံ မနုဿဝိဂ္ဂဟံ ကလလကာလေပိ တာပနမဒ္ဒနေဟိ ဝါ ဘေသဇ္ဇသမ္ပဒါနေန ဝါ တတော ဝါ ဥဒ္ဓမ္ပိ တဒနုရူပေန ဥပက္ကမေန ဇီဝိတာ ဝိယောဇေတီတိ အတ္ထော. သာသနာတိ ပရာပုဗ္ဗဇိဓာတုပ္ပယောဂေ နိဿက္ကဝစနံ၊ တေန သတ္ထုသာသနတောတိ အတ္ထော. ပရာဇိတောတိ ပရာဇယမာပန္နော. ဟောတီတိ ပါဌသေသော. တတိယပါရာဇိကံ.

၉. ဣဒါနိ စတုတ္ထံ ဒဿေတုံ ‘‘ဈာနာဒိဘေဒ’’န္တျာဒိ ဝုတ္တံ. တတ္ထ ယော ဘိက္ခု အညာပဒေသဉ္စ အဓိမာနဉ္စ ဝဇ္ဇေတွာ ဟဒယေ အသန္တံ ဈာနာဒိဘေဒံ ဓမ္မံ မနုဿဇာတိကဿ သတ္တဿ ဝဒေယျ၊ တသ္မိံ ခဏေ ဉာတေ သော တတော သာသနာ ပါရာဇိကော ဧဝ ဟောတီတိ အတ္ထော.

ဈာနာဒိဘေဒန္တိ ‘‘ဈာနံ ဝိမောက္ခော သမာဓိ သမာပတ္တိ ဉာဏဒဿနံ မဂ္ဂဘာဝနာ ဖလသစ္ဆိကိရိယာ ကိလေသပ္ပဟာနံ ဝိနီဝရဏတာ စိတ္တဿ သုညာဂါရေ အဘိရတီ’’တိ (ပါရာ. ၁၉၈) ဧဝံ ဝုတ္တံ ဈာနာဒိဘေဒံ ဥတ္တရိမနုဿဓမ္မံ. ဟဒယေတိ စိတ္တေ. အသန္တန္တိ အသံဝိဇ္ဇမာနံ. အညာပဒေသန္တိ ‘‘ယော တေ ဝိဟာရေ ဝသိ၊ သော ဘိက္ခု ပဌမဿ ဈာနဿ လာဘီ’’တိအာဒိနာ နယေန အညာပဒေသံ ဝဇ္ဇေတွာတိ အတ္ထော. ဝိနာတိ ဝဇ္ဇနတ္ထေ နိပါတော၊ တဿ ဝဇ္ဇေတွာတိ အတ္ထော. အဓိမာနန္တိ ‘‘အဓိဂတာ မယာ’’တိ ဧဝံ ဥပ္ပန္နံ မာနန္တိ အတ္ထော. အဓိဂတော မာနောတိ ဝိဂ္ဂဟော၊ တံ အဓိမာနံ ဝဇ္ဇေတွာတိ အတ္ထော. မနုဿဇာတိဿာတိ မနုဿဇာတိကဿ၊ န ဒေဝဗြဟ္မာဒီသု အညတရဿာတိ အတ္ထော. ဝဒေယျာတိ အာရောစေယျ. ဉာတက္ခဏေတိ ဉာတေ ခဏေတိ ဆေဒေါ၊ တသ္မိံ တေနာရောစိတက္ခဏေ မနုဿဇာတိကေန ဉာတေတိ အတ္ထော. တေနာတိ နိဿက္ကေ ကရဏဝစနံ၊ တတော သာသနတော ပါရာဇိကောတိ အတ္ထော. စတုတ္ထပါရာဇိကံ.

ပါရာဇိကနိဒ္ဒေသဝဏ္ဏနာ နိဋ္ဌိတာ.