၂၉. မိစ္ဆာဇီဝဝိဝဇ္ဇနာနိဒ္ဒေသဝဏ္ဏနာ

၂၀၉. အာဂမ္မ ဇီဝန္တိ ဧတေနာတိ အာဇီဝေါ၊ ကော သော? ပစ္စယပရိယေသနဝါယာမော. မိစ္ဆာယ အာဇီဝေါ၊ တဿ ဝိဝဇ္ဇနာ မိစ္ဆာဇီဝဝိဝဇ္ဇနာ. သာ ပနာယံ အတ္ထတော ‘‘ဣဓ ဘိက္ခု ပါတိမောက္ခသံဝရသံဝုတော ဝိဟရတိ အာစာရဂေါစရသမ္ပန္နော’’တိ (ဝိဘ. ၅၀၈) ဧဝံ ပါတိမောက္ခသံဝရသမ္ပတ္တိယာ ပဋိပတ္တိဒဿနဝသေန အာဂတော အာစာရော စေဝ ယထာက္ကမေန ပါရာဇိကသံဃာဒိသေသထုလ္လစ္စယပါစိတ္တိယပါဋိဒေသနီယဒုဗ္ဘာသိတဒုက္ကဋာနံ ကာရဏဘူတဿ အာဇီဝဟေတုပညတ္တာနံ အဘူတာရောစနသဉ္စရိတ္တအညာပဒေသဘူတာရောစနပဏီတဘောဇနဝိညတ္တိ ဘိက္ခုနိဘောဇနဝိညတ္တိသူပေါဒနဝိညတ္တိသိက္ခာပဒါနံ ဝီတိက္ကမဿ စ ကုဟနလပနနေမိတ္တိကတာ နိပ္ပေသိကတာ လာဘေန လာဘံ နိဇိဂီသနတာတိ ဧဝမာဒီနဉ္စ ပါပဓမ္မာနံ ဝသေန ပဝတ္တံ မိစ္ဆာဇီဝဝိရတိသင်္ခါတံ အာဇီဝပါရိသုဒ္ဓိသီလဉ္စ. တဿာ ပန ကဿစိ ဣဓ ဒဿနံ ယထာ ဒဿေတုမာရဒ္ဓံ ပါတိမောက္ခသံဝရသင်္ခါတာယ အဓိသီလသိက္ခာယ၊ စတုရာရက္ခဝိပဿနာဝသေန အာဂတာနံ အဓိစိတ္တအဓိပညာသင်္ခါတာနံ ဒွိန္နံ သိက္ခာနဉ္စ ဥပကာရကဓမ္မပရိဒီပနတ္ထန္တိ ဒဋ္ဌဗ္ဗံ၊ ဧဝမီဒိသံ ဝိညေယျံ၊ တံ ဒဿေတိ ‘‘ဒါရု’’န္တိအာဒိနာ. တတ္ထ ‘‘ဒါရု’’န္တိအာဒီနိ ‘‘ဒဒေ’’တိ ဧတဿ ပတ္တိကမ္မံ. စုဏ္ဏံ သိရီသစုဏ္ဏာဒိနဟာနိယစုဏ္ဏံ. နှာနမုခေါဒကန္တိ နှာနဉ္စ မုခဉ္စ၊ တဿ ဥဒကန္တိ သမာသော. အာဒိ-သဒ္ဒေန ပဏ္ဏာဒိံ သင်္ဂဏှာတိ. ကုလသင်္ဂဟာတိ ကုလသင်္ဂဟကရဏေန.

၂၁၀. ပရိဘဋတိ ပရေသံ ဒါရကေ ပရိဟရတီတိ ပရိဘဋော၊ ပရိဘဋဿ ကမ္မံ ပါရိဘဋကော၊ သကတ္ထေ တမေဝ ပါရိဘဋကတာ. အလင်္ကရဏာဒိနာ ကုလဒါရကပရိဟရဏဿေတံ နာမံ. မုဂ္ဂဿ သူပေါ မုဂ္ဂသူပေါ၊ သောယေဝ မုဂ္ဂသုပ္ပေါ. ယထာ မုဂ္ဂသူပေ ပစ္စမာနေ ကောစိဒေဝ မုဂ္ဂေါ န ပစ္စတိ၊ အဝသေသာ ပစ္စန္တိ၊ ဧဝံ ယဿ ပုဂ္ဂလဿ ဝစနေ ကိဉ္စိဒေဝ သစ္စံ ဟောတိ၊ သေသံ အလိကံ၊ အယံ ပုဂ္ဂလော မုဂ္ဂသူပသဒိသတာယ ဥပစာရေန ‘‘မုဂ္ဂသုပ္ပေါ’’တိ ဝုစ္စတိ၊ တဿ ဘာဝေါ မုဂ္ဂသုပ္ပတာ. သစ္စာလိကေန ဇီဝိတကပ္ပနဿေတံ အဓိဝစနံ. ဃရဝတ္ထုအာဒိသမ္ဗန္ဓိနီ ဝိဇ္ဇာ ဝတ္ထုဝိဇ္ဇာ. ပါရိဘဋကတာ စာတိအာဒိနာ ဒွန္ဒော နပုံသကတ္တာဘာဝေ ပါရိ။ပေ။ ဝိဇ္ဇာ၊ တာယ. ရဿော ပန ဂါထာဗန္ဓဝသေန၊ တထာ ဒီဃော. ပဟိဏာနံ တသ္မိံ တသ္မိံ ကမ္မေ တေသံ တေသံ နိယုဉ္ဇနံ ပဟေဏံ. အာဒရေန ဒူတေန ကာရေတဗ္ဗံ ယံ ကိဉ္စိ ကမ္မံ ဒူတကမ္မံ. ပိသနံ ပေသနံ၊ ဇင်္ဃာယ ပါဒေန ပေသနံ ဇင်္ဃပေသနံ၊ တမဿ အတ္ထီတိ ဇင်္ဃပေသနိယံ. တေသံ တေသံ ဂိဟီနံ ဂါမန္တရဒေသန္တရာဒီသု သာသနပဋိသာသနဟရဏဿေတမဓိဝစနံ.

၂၁၁. လာဘာသာယ လဉ္ဇဒါနံ အနုပ္ပဒါနံ. သမ္ဗုဒ္ဓပ္ပဋိကုဋ္ဌေန ဗုဒ္ဓဂရဟိတေန အင်္ဂဝိဇ္ဇာနက္ခတ္တဝိဇ္ဇာသုပိနဝိဇ္ဇာဘူတဝိဇ္ဇာဒိနာ အညေန ဝါ.

၂၁၂. အညာတကာနံ အပ္ပဝါရိတာနံ ဝိညာပနံ ဝိညတ္တိ၊ ယာစနဝသေန ပဝတ္တော ကာယဝစီပယောဂေါ. ဗုဒ္ဓပ္ပဋိကုဋ္ဌေန မိစ္ဆာဇီဝေန ပစ္စယပရိယေသနာ အနေသနာ. အဘူတဿ အတ္တနိ အဝိဇ္ဇမာနဿ ဥတ္တရိမနုဿဓမ္မဿ ဥလ္လပနံ ကထနံ အဘူတုလ္လပနာ. ကုဟနာဒီဟီတိ ကုဟနာလပနာဒီဟိ. တတ္ထ လာဘသက္ကာရသိလောကသန္နိဿိတဿ ပစ္စယပ္ပဋိသေဝနသာမန္တဇပ္ပနဣရိယာပထသဏ္ဌာပနဝသေန ဇနဝိမှာပနာ ကုဟနာ. ဝိဟာရံ အာဂတေ မနုဿေ ဒိသွာ ‘‘ကိမတ္ထာယ ဘောန္တော အာဂတာ၊ ကိံ ဘိက္ခူ နိမန္တေတု’’န္တိ ဝါ ‘‘မယိ ရာဇာ ပသန္နော၊ အသုကော စ အသုကော စ ရာဇမဟာမတ္တော ပသန္နော’’တိ ဝါ အာဒိနာ နယေန အာလပနာ လပနာ. ခါဒနီယံ ဂဟေတွာ ဂစ္ဆန္တေ ဒိသွာ ‘‘ကိံ ခါဒနီယံ လဘိတ္ထာ’’တိအာဒိနာ နယေန နိမိတ္တကရဏာဒိ နေမိတ္တကတာ. ‘‘အဿဒ္ဓေါ အပ္ပသန္နော’’တိအာဒိနာ နယေန ဂရဟဏာနိ စ ‘‘ဧတံ ဧတ္ထ ကထေထာ’’တိအာဒိနာ နယေန ဝါစာယ ဥက္ခိပနာဒိ စ နိပ္ပေသိကတာ. အပ္ပေန လာဘေန ဗဟုကံ ဝဉ္စေတွာ ဂဟေတုံ ဣစ္ဆနံ လာဘေန လာဘံ နိဇိဂီသနတာ. ကုလဒူသာဒီတိ ဧတ္ထ အာဒိ-သဒ္ဒေန ရူပိယပ္ပဋိဂ္ဂဟဏရူပိယသံဝေါဟာရာ သင်္ဂယှန္တီတိ.

မိစ္ဆာဇီဝဝိဝဇ္ဇနာနိဒ္ဒေသဝဏ္ဏနာ နိဋ္ဌိတာ.