၁၈. နဂ္ဂနိဒ္ဒေသဝဏ္ဏနာ

၁၆၆. ‘‘ဝဇေ’’တိအာဒီသု န-သဒ္ဒေါ သမ္ဗန္ဓိတဗ္ဗော. တတ္ထ ပန ယထာနုရူပဘောဇနာဒိကံ ကမ္မဝစနံ အဇ္ဈာဟရိတွာ ‘‘ဘောဇနံ န ဘုဉ္ဇေ’’တိအာဒိနာ အတ္ထော ဝေဒိတဗ္ဗော.

၁၆၇. န ကရေတိ ဟတ္ထကမ္မာဒိကံ ပရိကမ္မံ သယမ္ပိ န ကရေယျာတိ အတ္ထော. ပဋိစ္ဆာဒီသူတိ နိဒ္ဓါရဏေ ဘုမ္မံ၊ ဇန္တာဃရုဒကဝတ္ထပ္ပဋိစ္ဆာဒီနံ မဇ္ဈေတိ အတ္ထော. ပရိကမ္မေ ဒုဝေ ကပ္ပိယာတိ သမ္ဗန္ဓော. ပရိကမ္မေတိ ဇန္တာဃရေ ဥဒကေပိ ဥပဇ္ဈာယာဒီနံ ကတ္တဗ္ဗပရိကမ္မဝိသယေ၊ န အဘိဝါဒနာဒီသု. ဒုဝေတိ ဇန္တာဃရဥဒကပ္ပဋိစ္ဆာဒယော. ဆာဒေန္တိ ဧတာယာတိ ဆာဒိ၊ ဝတ္ထဿ ဆာဒိ ဝတ္ထစ္ဆာဒိ. သဗ္ဗတ္ထာတိ သဗ္ဗကမ္မေသူတိ.

နဂ္ဂနိဒ္ဒေသဝဏ္ဏနာ နိဋ္ဌိတာ.