၄၇. သုဒ္ဓိနိဒ္ဒေသဝဏ္ဏနာ

၄၅၅. ဒေသနာ သံဝရော ဧဋ္ဌိ၊ ပစ္စဝေက္ခဏ ဘေဒတောတိ (ပါရာ. အဋ္ဌ. ၂.၅၈၅၊ ဝိသုဒ္ဓိ. ၁.၁၉) ဒေသနာသုဒ္ဓိ သံဝရသုဒ္ဓိ ပရိယေဋ္ဌိသုဒ္ဓိ ပစ္စဝေက္ခဏသုဒ္ဓီတိ ဧဝံ စတုဗ္ဗိဓာ သုဒ္ဓီတိ အတ္ထော. ဣဒါနိ တာဟိ သုဒ္ဓီဟိ ဝိသုဇ္ဈနကေ ဒဿေတုံ ‘‘ပါတိမောက္ခသံဝရသမ္မတ’’န္တိအာဒိမာဟ.

၄၅၆. ‘‘ပုန ဧဝံ န ကရိဿ’’န္တိ စိတ္တာဓိဋ္ဌာနသံဝရာ ယသ္မာ သုဇ္ဈတိ ဣန္ဒြိယသံဝရော၊ တသ္မာ ဣန္ဒြိယသံဝရော ‘‘သံဝရသုဒ္ဓီ’’တိ ဝုတ္တောတိ သမ္ဗန္ဓော.

၄၅၇. ပဟာယာနေသနန္တိ အနေသနံ ပဟာယ ဓမ္မေန ဥပ္ပါဒေန္တဿ ပစ္စယေတိ ပါဌသေသော.

၄၅၈. ‘‘ပဋိသင်္ခါ ယောနိသော စီဝရံ ပဋိသေဝါမိ။ပေ။ ဥပ္ပန္နာနံ ဝေယျာဗာဓိကာနံ။ပေ။ ပရမတာယာ’’တိ (မ. နိ. ၁.၂၃၊ အ. နိ. ၆.၅၈) စ ဧဝံ စတူသုပိ ပစ္စယေသု ယထာဝုတ္တပစ္စဝေက္ခဏသုဇ္ဈနာတိ အတ္ထော. ဧတ္ထ ပန ဒုဝိဓံ ပစ္စဝေက္ခဏံ ပဋိလာဘကာလေ စ ပရိဘောဂကာလေ စ. ပဋိလာဘကာလေ ဟိ ဓာတုဝသေန ဝါ ပဋိက္ကူလဝသေန ဝါ ပစ္စဝေက္ခိတွာ ဌပိတစီဝရာဒီနိ တတော ဥတ္တရိ ပရိဘုဉ္ဇန္တဿ အနဝဇ္ဇောဝ ပရိဘောဂေါ၊ ပရိဘောဂကာလေပိ. သုဒ္ဓိဝိနိစ္ဆယော.

သုဒ္ဓိနိဒ္ဒေသဝဏ္ဏနာ နိဋ္ဌိတာ.