၁၇. အာပုစ္ဆကရဏနိဒ္ဒေသဝဏ္ဏနာ

၁၆၁. ထေရေနာတိ သင်္ဃတ္ထေရေန.

၁၆၂. တတ္ထ တတ္ထ သန္နိပတိတာနံ သဗ္ဗေသံ ဝုဍ္ဎော ဝုဍ္ဎတရော၊ တသ္မိံ ဝုဍ္ဎတရာဂမေ ပုန အာပုစ္ဆနံ နတ္ထိ. ဘတ္တဂ္ဂေ စာနုမောဒတောတိ ဧတ္ထ ဒါနပတိနာ ယာစိတေန ဒဟရေန ဝုဍ္ဎေန အနာပုစ္ဆိတွာ ကထေတုံ ဝဋ္ဋတီတိ ဝဒန္တိ.

၁၆၃. ဧကဝိဟာရကေတိ ဧကောဝရကေ ဝုဍ္ဎေန ဝသန္တော အနာပုစ္ဆာ န သဇ္ဈာယေယျာတိ အတ္ထော. ဥဒ္ဒေသံ ပရိပုစ္ဆဉ္စ နော ဒဒေတိ ဥဒ္ဒေသံ ဝါ ပရိပုစ္ဆံ ဝါ နော ဒဒေယျ.

၁၆၄. န ဝိဝရေယျ န ထကေယျ စာတိ သမ္ဗန္ဓော. ဒွါရံ နာမ မဟာဝဠဉ္ဇံ၊ တတ္ထ အာပုစ္ဆနကိစ္စံ နတ္ထိ.

၁၆၅. ဝုဍ္ဎေန စင်္ကမေ စင်္ကမန္တောပိ ယေန ဝုဍ္ဎော၊ တေန ပရိဝတ္တယေတိ သမ္ဗန္ဓော. အာပုစ္ဆကရဏဝိနိစ္ဆယော.

အာပုစ္ဆကရဏနိဒ္ဒေသဝဏ္ဏနာ နိဋ္ဌိတာ.