၅၀. ဝိပဿနာနိဒ္ဒေသော
ဝိပဿနာတိ –
၄၇၁. နာမရူပံ ပရိဂ္ဂယှ၊ တတော တဿ စ ပစ္စယံ၊
ဟုတွာ အဘာဝတောနိစ္စာ၊ ဥဒယဗ္ဗယပီဠနာ.
၄၇၂. ဒုက္ခာ အဝသဝတ္တိတ္တာ၊ အနတ္တာတိ တိလက္ခဏံ၊
အာရောပေတွာန သင်္ခါရေ၊ သမ္မသန္တော ပုနပ္ပုနံ၊
ပါပုဏေယျာနုပုဗ္ဗေန၊ သဗ္ဗသံယောဇနက္ခယန္တိ.
နိဂမနကထာ
၄၇၃. အဓိသီလာဓိစိတ္တာနံ၊ အဓိပညာယ သိက္ခနာ၊
ဘိက္ခုကိစ္စမတော ခုဒ္ဒသိက္ခာယံ သမုဒါဟဋာ.
၄၇၄. မဟတော ကိတ္တိသဒ္ဒဿ၊ ယဿ လောကဝိစာရိနော၊
ပရိဿမော န သမ္ဘောတိ၊ မာလုတဿေဝ နိစ္စသော.
၄၇၅. တေန ဓမ္မသိရီကေန၊ တမ္ဗပဏ္ဏိယကေတုနာ၊
ထေရေန ရစိတာ ဓမ္မဝိနယညုပသံသိတာ.
၄၇၆. ဧတ္တာဝတာယံ နိဋ္ဌာနံ၊ ခုဒ္ဒသိက္ခာ ဥပါဂတာ၊
ပဉ္စမတ္တေဟိ ဂါထာနံ၊ သတေဟိ ပရိမာဏတောတိ.
ခုဒ္ဒသိက္ခာ နိဋ္ဌိတာ.
နမော တဿ ဘဂဝတော အရဟတော သမ္မာသမ္ဗုဒ္ဓဿ