၃၈. ကုလဒူသနနိဒ္ဒေသော

ဒူသနန္တိ –

၂၉၇. ပုပ္ဖံ ဝေဠုံ ဖလံ စုဏ္ဏံ၊ ဒန္တကဋ္ဌဉ္စ မတ္တိကံ၊

သင်္ဂဟဏတ္ထံ ဒဒတော၊ ကုလဒူသနဒုက္ကဋံ.

၂၉၈. ထုလ္လစ္စယံ ဂရုဘဏ္ဍံ၊ ဣဿရေနေတ္ထ သံဃိကံ၊

ဒေန္တဿ ဒုက္ကဋာဒီနိ၊ ထေယျာ သံဃည သန္တကံ.

၂၉၉. ကုလသင်္ဂဟာ ရောပေတုံ၊ ရောပါပေတုဉ္စ သဗ္ဗထာ၊

ဖလပုပ္ဖူပဂံ ရုက္ခံ၊ ဇဂ္ဂိတုဉ္စ န ဝဋ္ဋတိ.

၃၀၀. နိမိတ္တောဘာသတော ကပ္ပဝေါဟာရပရိယာယတော၊

အတ္တနော ပရိဘောဂတ္ထံ၊ ရောပနာဒီနိ လဗ္ဘရေ.

၃၀၁. ဝုတ္တာဝ ဝေဇ္ဇိကာ ဇင်္ဃပေသနေ ဂိဟိကမ္မသု၊

ဌပေတွာ ပိတရော ဘဏ္ဍုံ၊ ဝေယျာဝစ္စကရံ သကံ.

၃၀၂. ဒုက္ကဋံ ပဒဝါရေန၊ ဟရဏေ ဒူတသာသနံ၊

သာသနံ အဂ္ဂဟေတွာပိ၊ ပဌမံ ဝဒတော ပုန.

၃၀၃. ဥပ္ပန္နပစ္စယာ ဧဝံ၊ ပဉ္စန္နမ္ပိ အကပ္ပိယာ၊

အဘူတာရောစနာရူပ-သံဝေါဟာရုဂ္ဂဟာဒိသာ.

၃၀၄. ဟရာပေတွာ ဟရိတွာပိ၊ ပိတူနံ သေသဉာတိနံ၊

ပတ္တာနံ ဝတ္ထုပူဇတ္ထံ၊ ဒါတုံ ပုပ္ဖါနိ လဗ္ဘတိ၊

မဏ္ဍနတ္ထဉ္စ လိင်္ဂါဒိ-ပူဇတ္ထဉ္စ န လဗ္ဘတိ.

၃၀၅. တထာ ဖလံ ဂိလာနာနံ၊ သမ္ပတ္တိဿရိယဿ စ၊

ပရိဗ္ဗယဝိဟီနာနံ၊ ဒါတုံ သပရသန္တကံ.

၃၀၆. ဘာဇေန္တေ ဖလပုပ္ဖမှိ၊ ဒေယျံ ပတ္တဿ ကဿစိ၊

သမ္မတေနာပလောကေတွာ၊ ဒါတဗ္ဗမိတရေန တု.

၃၀၇. ဝိဟာရေ ဝါ ပရိစ္ဆိဇ္ဇ၊ ကတွာန ကတိကံ တတော၊

ဒေယျံ ယထာပရိစ္ဆေဒံ၊ ဂိလာနဿေတရဿ ဝါ၊

ယာစမာနဿ ကတိကံ၊ ဝတွာ ရုက္ခာဝ ဒဿိယာ.

၃၀၈. သိရီသကသဝါဒီနံ၊ စုဏ္ဏေ သေသေ စ နိစ္ဆယော၊

ယထာဝုတ္တနယော ဧဝ၊ ပဏ္ဏမ္ပေတ္ထ ပဝေသယေတိ.