၃၉. ဝဿူပနာယိကနိဒ္ဒေသော

ဝဿူပနာယိကာ စေဝါတိ –

၃၀၉. ပုရိမိကာ ပစ္ဆိမိကာ၊ ဒုဝေ ဝဿူပနာယိကာ၊

တတ္ထာလယပရိဂ္ဂါဟော၊ ဝစီဘေဒေါ စ ဧဒိသော.

၃၁၀. ‘‘ဣမသ္မိံ ဝိဟာရေ ဣမံ၊ တေမာသံ ဝဿံ ဥပေမိ၊

ဣဓ ဝဿံ ဥပေမီ’’တိ၊ စိတ္တုပ္ပါဒေတ္ထ အာလယော.

၃၁၁. နောပေတုကာမော အာဝါသံ၊ တဒဟူတိက္ကမေယျ ဝါ၊

ဘဝေယျ ဒုက္ကဋာပတ္တိ၊ ဇာနံ ဝါနုပဂစ္ဆတော.

၃၁၂. ဒုတိယံ ဥပဂစ္ဆေယျ၊ ဆိန္နဝဿောနုပါဂတော၊

န ပက္ကမေယျ တေမာသံ၊ အဝသိတွာန စာရိကံ.

၃၁၃. မာတာပိတူနမတ္ထာယ၊ ပဉ္စန္နံ သဟဓမ္မိနံ၊

ဂိလာနတဒုပဋ္ဌာက-ဘတ္တမေသိဿမောသဓံ.

၃၁၄. ပုစ္ဆိဿာမိ ဥပဋ္ဌိဿံ၊ ဂန္တွာနဘိရတံ အဟံ၊

ဝူပကာသိဿံ ကုက္ကုစ္စံ၊ ဒိဋ္ဌိံ ဂရုကမာဒိကံ.

၃၁၅. ကရိဿံ ဝါပိ ကာရေဿံ၊ ဝိနောဒနံ ဝိဝေစနံ၊

ဝုဋ္ဌာနံ ဝါပိ ဥဿုက္ကံ၊ ဂန္တုမိစ္စေဝမာဒိနာ၊

လဗ္ဘံ သတ္တာဟကိစ္စေန၊ ပဟိတာပဟိတေပိ ဝါ.

၃၁၆. သံဃကမ္မေ ဝဇေ ဓမ္မ-ဿဝနတ္ထံ နိမန္တိတော၊

ဂရူဟိ ပဟိတော ဝါပိ၊ ဂရူနံ ဝါပိ ပဿိတုံ.

၃၁၇. န ဘဏ္ဍဓောဝနုဒ္ဒေသ-ဉာတုပဋ္ဌာကဒဿနေ၊

လဗ္ဘံ န ပါပုဏေယျဇ္ဇေ-ဝါဂမိဿန္တုဒူရဂေါ.

၃၁၈. သေသဉာတီဟိ ပဟိတေ၊ ဘိက္ခုနိဿိတကေန စ၊

ဥပါသကောပါသိကာဟိ၊ နိဒ္ဒိသိတွာဝ ပေသိတေ.

၃၁၉. ဝဿစ္ဆေဒေ အနာပတ္တိ၊ အန္တရာယေ သတတ္တနော၊

သံဃသာမဂ္ဂိယာ ဝါ နော၊ ဆိန္နဝဿော ပဝါရယေ.

၃၂၀. အဇ္ဈောကာသေ စ ရုက္ခဿ၊ သုသိရေ ဝိဋပေပိ ဝါ၊

ဆဝကုဋိဆတ္တစာဋီ-သူပဂန္တုံ န ဝဋ္ဋတိ.

၃၂၁. အသေနာသနိကေနာပိ၊ ဥပဂန္တုံ န လဗ္ဘတိ၊

ပဝါရေတုဉ္စ လဗ္ဘတိ၊ နာဝါသတ္ထဝဇူပဂေါတိ.