၂၈. ကမ္မနိဒ္ဒေသော

ကမ္မဉ္စာတိ –

၁၉၉. ဝဂ္ဂေန အဓမ္မကမ္မံ၊ သမဂ္ဂေန အဓမ္မိကံ၊

ဝဂ္ဂေန ဓမ္မကမ္မဉ္စ၊ သမဂ္ဂေန စ ဓမ္မိကံ၊

စတုတ္ထံယေဝါနုညာတံ၊ သေသကမ္မေသု ဒုက္ကဋံ.

၂၀၀. စတုဝဂ္ဂေါ ပဉ္စဝဂ္ဂေါ၊ ဒသဝီသတိဝဂ္ဂိကော၊

တိရေကဝီသတိဝဂ္ဂေါ၊ ပဉ္စ သံဃာ ဝိဘာဝိတာ.

၂၀၁. စတုဝဂ္ဂေတ္ထ အဗ္ဘာနု-ပသမ္ပဒါပဝါရဏာ၊

ပဉ္စဝဂ္ဂေါ စ အဗ္ဘာနံ၊ မဇ္ဈဒေသုပသမ္ပဒံ.

၂၀၂. ဒသဝဂ္ဂေါ စ အဗ္ဘာနံ၊ ဌပေတွာ သဗ္ဗကမ္မိကော၊

ဣတရော သဗ္ဗကမ္မေသု၊ ကမ္မပ္ပတ္တောတိ ဒီပိတော.

၂၀၃. စတုဝဂ္ဂေန ကတ္တဗ္ဗေ၊ စတ္တာရော ပကတတ္တကာ၊

ကမ္မပ္ပတ္တာ ပရေ ဆန္ဒာ-ရဟာ သေသေပျယံ နယော.

၂၀၄. စတုဝဂ္ဂါဒိကတ္တဗ္ဗံ၊ အသံဝါသကမ္မာရဟ၊

ဂရုကဋ္ဌေသွညတရံ၊ ကတွာန ဂဏပူရကံ၊

ပရိဝါသာဒိကံ ကမ္မံ၊ ကတံ ကုပ္ပဉ္စ ဒုက္ကဋံ.

၂၀၅. အဓမ္မကမ္မံ ဝါရေယျ၊ အန္တရာယေ ဒုဝေ တယော၊

ဒိဋ္ဌာဝိမေကောဓိဋ္ဌာနံ၊ ဝါရေန္တေဝ တတောဓိကာ.

၂၀၆. ကမ္မာရဟာ အသံဝါသာ၊ ခိတ္တစိတ္တဒုခဋ္ဋိတာ၊

ဧတေသံ သံဃမဇ္ဈမှိ၊ ပဋိက္ခေပေါ န ရုဟတိ.

၂၀၇. ပကတတ္တေကသီမဋ္ဌ-သမသံဝါသဘိက္ခုနော၊

အာရောစေန္တဿန္တမသော-နန္တရဿာပိ ရူဟတိ.

၂၀၈. ကောပေတုံ ဓမ္မိကံ ကမ္မံ၊ ပဋိက္ကောသေယျ သမ္မုခါ၊

တိရောက္ခာ ကာယသာမဂ္ဂိံ၊ ဆန္ဒံ နော ဒေယျ ဒုက္ကဋန္တိ.