၇. မဟာနာမသိက္ခာပဒဝဏ္ဏနာ

ပဏီတဘောဇနသိက္ခာပဒေ ‘‘မဟာနာမသိက္ခာပဒေန ကာရေတဗ္ဗော’’တိ (ကင်္ခါ. အဋ္ဌ. ပဏီတဘောဇနသိက္ခာပဒဝဏ္ဏနာ) ယံ ဝုတ္တံ၊ တဿတ္ထော သံဃဝသေန ပဝါရိတေ ဘေသဇ္ဇတ္ထာယ သပ္ပိအာဒိဘေသဇ္ဇပဉ္စကံ ဝိညာပေတိ စေ၊ ‘‘နဘေသဇ္ဇေန ကရဏီယေန ဘေသဇ္ဇံ ဝိညာပေတီ’’တိ (ပါစိ. ၃၀၉) ဝစနေန ပါစိတ္တိယန္တိ (ဝဇိရ. ဋီ. ပါစိတ္တိယ ၃၁၀) လိခိတံ. ‘‘တယာ ဣမိနာဝ ပဝါရိတမှာ၊ အမှာကဉ္စ ဣမိနာ စ ဣမိနာ စ အတ္ထော’’တိ ယထာဘူတံ အာစိက္ခိတွာ ဝိညာပေတုံ ဂိလာနောဝ လဘတိ၊ န ဣတရောတိ စ၊ ‘‘အညဿ အတ္ထာယာ’’တိ အဿ ဉာတကပ္ပဝါရိတေ၊ အတ္တနော ဝါ ဉာတကပ္ပဝါရိတေတိ အတ္ထောတိ စ၊ ‘‘အပရိယန္တပ္ပဝါရဏာယ ပဝါရိတေ’’တိ သံဃဝသေန၊ ပုဂ္ဂလဝသေန စ ပဝါရေတွာ ဒါယကာ. တသ္မာ ‘‘သံဃပ္ပဝါရဏတာ’’တိ ဝတွာ ‘‘ပုဂ္ဂလပ္ပဝါရဏတာ’’တိ န ဝုတ္တန္တိ စ၊ ‘‘ပရိယန္တာတိက္ကမော’’တိ ဝစနေန ဂိလာနော ဂဟိတော၊ တသ္မာ ‘‘ဂိလာနာဂိလာနတာ’’တိ န ဝုတ္တံ. ဧဝံ သန္တေပိ ‘‘သံဃပ္ပဝါရဏာယ ပဝါရဏတာ’’တိ ပါဌောတိ စ လိခိတံ၊ ဝီမံသိတဗ္ဗံ.

မဟာနာမသိက္ခာပဒဝဏ္ဏနာ နိဋ္ဌိတာ.