၂. သုဒ္ဓကာဠကသိက္ခာပဒဝဏ္ဏနာ

ကာဠကာနန္တိ သဘာဝေန ဝါ ရဇနေန ဝါ ကာဠကာနံ. ယထာဟ ‘‘ကာဠကံ နာမ ဒွေ ကာဠကာနိ ဇာတိယာ ကာဠကံ ဝါ ရဇနကာဠကံ ဝါ’’တိ. အညေဟိ အမိဿိတာနန္တိ အညေဟိ အမိဿိတကာဠကာနန္တိ အတ္ထော. ‘‘ယထာ ပဌမေ ‘ဧကေနာပိ ကောသိယံသုနာ’တိ (ကင်္ခါ. အဋ္ဌ. ကောသိယသိက္ခာပဒဝဏ္ဏနာ) ဝုတ္တံ၊ တထာ ဣဓာပိ ‘ဧကေနာပိ အညေန အမိဿေတွာ’တိ အဝုတ္တတ္တာ အညေန ပန မိဿကဘောဂေပိ အပညာယမာနရူပကံ စေ ‘သုဒ္ဓကာဠက’မိစ္စေဝ ဝုစ္စတီ’’တိ (ဝဇိရ. ဋီ. ပါရာဇိက ၅၄၇) ဝဒန္တိ.

ဧတ္ထ စ ‘‘ဣဒံ မေ၊ ဘန္တေ၊ သုဒ္ဓကာဠကာနံ ဧဠကလောမာနံ သန္ထတ’’န္တိအာဒိနာ (ပါရာ. ၅၄၉) နိဿဇ္ဇနဝိဓာနံ ဝေဒိတဗ္ဗံ. သေသန္တိ ပုဗ္ဗပယောဂဒုက္ကဋစတုက္ကပါစိတ္တိယာဒိကံ. အင်္ဂေသု ပန ‘‘သုဒ္ဓကာဠကဘာဝေါ’’တိ အယံ ဝိသေသော.

သုဒ္ဓကာဠကသိက္ခာပဒဝဏ္ဏနာ နိဋ္ဌိတာ.