၆. အညာတကဝိညတ္တိသိက္ခာပဒဝဏ္ဏနာ

ဂေဟဿ ပတိ ဇေဋ္ဌောတိ ဂဟပတိ၊ တံ ဂဟပတိံ၊ ဣဓ ပန အပဗ္ဗဇိတော ယော ကောစိ မနုဿော အဓိပ္ပေတော. တေနာဟ ‘‘ဘိက္ခူသု အပဗ္ဗဇိတမနုဿ’’န္တိ. ဧသေဝ နယော ဂဟပတာနိန္တိ ဧတ္ထာပိ. ‘‘ဝိညာပေယျာ’’တိ ဣဒံ သုဒ္ဓကတ္တုအတ္ထေ စ ဟေတုကတ္တုအတ္ထေ စ ဝတ္တတီတိ အာဟ ‘‘ယာစေယျ ဝါ ယာစာပေယျ ဝါ’’တိ. ယာစာပနဉ္စေတ္ထ အတ္တနော အတ္ထာယေဝါတိ ဒဋ္ဌဗ္ဗံ. ဧဝဉ္စ ပန ကတွာ ‘‘အနာဏတ္တိက’’န္တိ ဣဒံ သမတ္ထိတံ ဟောတိ. အညတြ သမယာတိ သမေတိ ဧတ္ထ၊ ဧတေန ဝါ သံဂစ္ဆတိ သတ္တော၊ သဘာဝဓမ္မော ဝါ သဟဇာတာဒီဟိ၊ ဥပ္ပါဒါဒီဟိ ဝါတိ သမယော၊ ကာလော၊ ဓမ္မပ္ပဝတ္တိမတ္တတာယ အတ္ထတော အဘူတောပိ ဟိ ကာလော ဓမ္မပ္ပဝတ္တိယာ အဓိကရဏံ၊ ကရဏံ ဝိယ စ ကပ္ပနာမတ္တသိဒ္ဓေန ရူပေန ဝေါဟရီယတိ၊ တံ သမယံ ဌပေတွာတိ အတ္ထော. တေနာဟ ‘‘ယော အစ္ဆိန္နစီဝရော ဝါ ဟောတီ’’တိအာဒိ. တတ္ထ ရာဇာဒီသု ယေဟိ ကေဟိစိ အစ္ဆိန္နံ စီဝရံ ဧတဿာတိ အစ္ဆိန္နစီဝရော. ယထာဟ ‘‘အစ္ဆိန္နစီဝရော နာမ ဘိက္ခုဿ စီဝရံ အစ္ဆိန္နံ ဟောတိ၊ ရာဇူဟိ ဝါ စောရေဟိ ဝါ ဓုတ္တေဟိ ဝါ ယေဟိ ကေဟိစိ ဝါ အစ္ဆိန္နံ ဟောတီ’’တိ. အဂ္ဂိအာဒီသု ယေန ကေနစိ နဋ္ဌံ စီဝရမေတဿာတိ နဋ္ဌစီဝရော. ယထာဟ ‘‘နဋ္ဌစီဝရော နာမ ဘိက္ခုဿ စီဝရံ အဂ္ဂိနာ ဝါ ဒဍ္ဎံ ဟောတိ၊ ဥဒကေန ဝါ ဝူဠှံ ဟောတိ၊ ဥန္ဒူရေဟိ ဝါ ဥပစိကာဟိ ဝါ ခါယိတံ ဟောတိ၊ ပရိဘောဂဇိဏ္ဏံ ဝါ ဟောတီ’’တိ (ပါရာ. ၅၁၉). သမယာတိ အညတြသဒ္ဒါပေက္ခာယ ဥပယောဂတ္ထေ နိဿက္ကဝစနန္တိ အာဟ ‘‘တံ သမယ’’န္တိ. အညသ္မိန္တိ အညသ္မိံ သမယေ.

တိကပါစိတ္တိယန္တိ အညာတကေ အညာတကသညိဝေမတိကညာတကသညီနံ ဝသေန တီဏိ ပါစိတ္တိယာနိ. သမယေတိ ယထာဝုတ္တေ အစ္ဆိန္နစီဝရကာလေ စ နဋ္ဌစီဝရကာလေ စ. ဉာတကပ္ပဝါရိတေ ဝါ ဝိညာပေန္တဿာတိ ဉာတကေ၊ ပဝါရိတေ စ ‘‘တုမှာကံ သန္ထတံ ဒေထာ’’တိ ယာစန္တဿ. ဧတ္ထ (ပါရာ. အဋ္ဌ. ၂.၅၂၁) စ သံဃဝသေန ပဝါရိတေ ပမာဏမေဝ ယာစိတုံ ဝဋ္ဋတိ၊ ပုဂ္ဂလိကဝသေန ပဝါရိတေ ပန ယံ ယံ ပဝါရေန္တိ၊ တံ တမေဝ ဝိညာပေတဗ္ဗံ. ယော ဟိ စတူဟိ ပစ္စယေဟိ ပဝါရေတွာ သယမေဝ သလ္လက္ခေတွာ ကာလာနုကာလံ စီဝရာဒီနိ ဒိဝသေ ဒိဝသေ ယာဂုဘတ္တာဒီနိ ဒေတိ၊ ဧဝံ ယေန ယေန အတ္ထော၊ တံ တံ ဒေတိ၊ တဿ ဝိညာပနကိစ္စံ နတ္ထိ. ယော ပန ပဝါရေတွာ ဗာလတာယ ဝါ သတိသမ္မောသေန ဝါ န ဒေတိ၊ သော ဝိညာပေတဗ္ဗော. ယော ‘‘မယှံ ဂေဟံ ပဝါရေမီ’’တိ ဝဒတိ၊ တဿ ဂေဟံ ဂန္တွာ ယထာသုခံ နိသီဒိတဗ္ဗံ နိပဇ္ဇိတဗ္ဗံ၊ န ကိဉ္စိ ဂဟေတဗ္ဗံ. ယော ပန ‘‘ယံ မယှံ ဂေဟေ အတ္ထိ၊ တံ ပဝါရေမီ’’တိ ဝဒတိ၊ ယံ တတ္ထ ကပ္ပိယံ၊ တံ ဝိညာပေတဗ္ဗံ. ဂေဟေ ပန နိသီဒိတုံ ဝါ နိပဇ္ဇိတုံ ဝါ န လဗ္ဘတိ. တဿေဝတ္ထာယာတိ ‘‘အညဿာ’’တိ လဒ္ဓဝေါဟာရဿ တဿေဝ ဗုဒ္ဓရက္ခိတဿ ဝါ ဓမ္မရက္ခိတဿ ဝါ အတ္ထာယ. အတ္တနော ဓနေန ဂဏှန္တဿာတိ အတ္တနော ကပ္ပိယဘဏ္ဍေန ကပ္ပိယဝေါဟာရေနေဝ ဂဏှန္တဿ စေတာပေန္တဿ၊ ပရိဝတ္တာပေန္တဿာတိ အတ္ထော.

အညာတကဝိညတ္တိသိက္ခာပဒဝဏ္ဏနာ နိဋ္ဌိတာ.