၂. ကာယသံသဂ္ဂသိက္ခာပဒဝဏ္ဏနာ

‘‘ဩတိဏ္ဏော’’တိ (သာရတ္ထ. ဋီ. ၂.၂၇၀) ဣဒံ ကမ္မသာဓနံ၊ ကတ္တုသာဓနံ ဝါ ဟောတီတိ တဒုဘယဝသေန အတ္ထံ ဒဿေန္တော ‘‘ယက္ခာဒီဟိ ဝိယ သတ္တာ’’တိအာဒိမာဟ. အသမပေက္ခိတွာတိ ယထာသဘာဝံ အနုပပရိက္ခိတွာ၊ ယထာ တေ ရတိဇနကာ ရူပါဒယော ဝိသယာ အနိစ္စဒုက္ခာသုဘာနတ္တာကာရေန အဝဋ္ဌိတာ၊ တထာ အပဿိတွာတိ ဝုတ္တံ ဟောတိ. ပရိဏတေနာတိ ပရိဝတ္တေန. တေနာဟ ‘‘ယထာ ပရိဝတ္တမာန’’န္တိအာဒိ. ဝုတ္တရာဂဝသေနာတိ ကာယသံသဂ္ဂရာဂဝသေန. တဒဟုဇာတာယပီတိ တသ္မိံ အဟနိ ဇာတံ ဇနနံ ဧတိဿာတိ တဒဟုဇာတာ၊ တသ္မိံ အဟနိ ဇာတာတိ ဝါ တဒဟုဇာတာ၊ တာယ၊ တံ ဒိဝသံ ဇာတာယပီတိ အတ္ထော၊ ဇာတမတ္တာယ အလ္လမံသပေသိဝဏ္ဏာယပီတိ ဝုတ္တံ ဟောတိ.

အဿာတိ ‘‘ကာယသံသဂ္ဂံ သမာပဇ္ဇေယျာ’’တိ ပဒဿ. ဣဒါနိ ဟတ္ထာဒီနံ ဝိဘာဂဒဿနတ္ထံ ‘‘တတ္ထ ဟတ္ထော နာမ ကပ္ပရတော ပဋ္ဌာယာ’’တိအာဒိမာဟ. ကပ္ပရတော ပဋ္ဌာယာတိ ဒုတိယမဟာသန္ဓိံ ဥပါဒါယ. အညတ္ထ ပန မဏိဗန္ဓတော ပဋ္ဌာယ ယာဝ အဂ္ဂနခါ ဟတ္ထော. ဝိနန္ဓိတွာ ဝါ အဝိနန္ဓိတွာ ဝါ ကတကေသကလာပဿေတံ အဓိဝစနန္တိ သမ္ဗန္ဓော. တတ္ထ ဝိနန္ဓိတွာတိ တီဟိ ကေသဝဋ္ဋီဟိ ဂန္ထိတွာ. သုဝဏ္ဏစီရကန္တိ သုဝဏ္ဏပါဠိံ. ဟတ္ထဉ္စ ဝေဏိဉ္စ ဌပေတွာ အဝသေသသရီရံ အင်္ဂန္တိ အာဟ ‘‘အဝသေသဿ သရီရဿာ’’တိအာဒိ.

ယော ဟိ သေဝနာဓိပ္ပါယောပိ နိစ္စလေန ကာယေန ကေဝလံ ဖဿံ ပဋိဝိဇာနာတိ သာဒိယတိ အနုဘောတိ၊ တဿ စိတ္တုပ္ပါဒမတ္တေ အာပတ္တိယာ အဘာဝတော အနာပတ္တီတိ အာဟ ‘‘ကာယေန အဝါယမိတွာ’’တိအာဒိ. မောက္ခာဓိပ္ပါယေနာတိ ဣတ္ထိတော မုစ္စိတုကာမတာဓိပ္ပါယေန. အသဉ္စိစ္စာတိ ‘‘ဣမိနာ ဥပါယေန ဣမံ ဖုသိဿာမီ’’တိ အစေတေတွာ. ဧဝဉှိ အစေတေတွာ ပတ္တပ္ပဋိဂ္ဂဟဏာဒီသု မာတုဂါမဿ အင်္ဂေ ဖုဋ္ဌေပိ အနာပတ္တိ. အသတိယာတိ အညဝိဟိတော ဟောတိ၊ ‘‘မာတုဂါမံ ဖုသိဿာမီ’’တိ သတိ နတ္ထိ၊ ဧဝံ အသတိယာ ဟတ္ထပါဒပသာရဏာဒိကာလေ ဖုသန္တဿ အနာပတ္တိ. အဇာနန္တဿာတိ ဒါရကဝေသေန ဌိတံ ဒါရိကံ ‘‘ဣတ္ထီ’’တိ အဇာနန္တော ကေနစိဒေဝ ကရဏီယေန ဖုသတိ၊ ဧဝံ ‘‘ဣတ္ထီ’’တိ အဇာနန္တဿ ဖုသတော အနာပတ္တိ. အသာဒိယန္တဿာတိ ကာယသံသဂ္ဂံ အသာဒိယန္တဿ ဗာဟာပရမ္ပရာယ နီတဘိက္ခုဿ ဝိယ အနာပတ္တိ. ဣဓ ပန ဥဒါယိတ္ထေရော အာဒိကမ္မိကော. တဿ အနာပတ္တိ အာဒိကမ္မိကဿာတိ.

ကာယသံသဂ္ဂသိက္ခာပဒဝဏ္ဏနာ နိဋ္ဌိတာ.