၇-၁၀. ပဋိဗာဟနာဒိသိက္ခာပဒဝဏ္ဏနာ

အာနိသံသံ ဒဿေတွာ ပဋိဗာဟန္တိယာတိ ‘‘ဧကိဿာ ဧကံ သာဋကံ နပ္ပဟောတိ၊ အာဂမေထ တာဝ၊ ကတိပါဟေန ဥပ္ပဇ္ဇိဿတိ၊ တတော ဘာဇေဿာမာ’’တိ (ပါစိ. အဋ္ဌ. ၉၁၅) ဧဝံ အာနိသံသံ ဒဿေတွာ ပဋိဗာဟန္တိယာ အနာပတ္တိ.

အဋ္ဌမနဝမာနိ ဥတ္တာနတ္ထာနေဝ.

သေသန္တိ ‘‘ဓမ္မိကေ ဝေမတိကာယာ’’တိအာဒိကံ အဝသေသံ. တတ္ထ အာနိသံသံ ဒဿေတွာ ပဋိဗာဟန္တိယာတိ ‘‘ဘိက္ခုနိသံဃော ဇိဏ္ဏစီဝရော၊ ကထိနာနိသံသမူလကော မဟာလာဘော’’တိ (ပါစိ. အဋ္ဌ. ၉၃၁) ဧဝရူပံ အာနိသံသံ ဒဿေတွာ ပဋိဗာဟန္တိယာ အနာပတ္တိ.

ပဋိဗာဟနာဒိသိက္ခာပဒဝဏ္ဏနာ နိဋ္ဌိတာ.

နဂ္ဂဝဂ္ဂေါ တတိယော.