၃. နဂ္ဂဝဂ္ဂေါ

၁-၂. နဂ္ဂါဒိသိက္ခာပဒဝဏ္ဏနာ

ဣဒန္တိ ဣဒံ ဥဒကသာဋိကစီဝရံ.

ဒုတိယံ ဥတ္တာနတ္ထမေဝ.

နဂ္ဂါဒိသိက္ခာပဒဝဏ္ဏနာ နိဋ္ဌိတာ.

၃. စီဝရသိဗ္ဗနသိက္ခာပဒဝဏ္ဏနာ

ဝိသိဗ္ဗေတွာတိ ဝိဇဋေတွာ. ဓုရံ နိက္ခိတ္တမတ္တေတိ ဓုရေ နိက္ခိတ္တမတ္တေ၊ ဓုရံ နိက္ခိပိတွာ သစေပိ ပစ္ဆာ သိဗ္ဗတိ၊ အာပတ္တိယေဝါတိ အတ္ထော.

စီဝရသိဗ္ဗနသိက္ခာပဒဝဏ္ဏနာ နိဋ္ဌိတာ.

၄. သင်္ဃာဋိစာရသိက္ခာပဒဝဏ္ဏနာ

‘‘ဣဒံ မေ စီဝရံ မဟဂ္ဃံ ဤဒိသေ စောရဘယေ န သက္ကာ ဓာရေတုန္တိ ဧဝရူပါသု အာပဒါသူ’’တိ ဧတ္ထ ပါဌော. သော ပန ကာကပဒသဉ္ဇနိတမောဟေဟိ လေခကေဟိ ဥပရိသိက္ခာပဒေ လိခိတော. ကိဉ္စာပိ တတ္ထ လိခိတော၊ ဧတ္ထေဝ ပန ဒဋ္ဌဗ္ဗော.

သင်္ဃာဋိစာရသိက္ခာပဒဝဏ္ဏနာ နိဋ္ဌိတာ.

၅. စီဝရသင်္ကမနီယသိက္ခာပဒဝဏ္ဏနာ

အာပဒါသု ဝါ ဓာရေတီတိ သစေ အပါရုတံ ဝါ အနိဝတ္ထံ ဝါ စောရာ ဟရန္တိ၊ ဧဝရူပါသူ အာပဒါသု ဓာရေတိ၊ အနာပတ္တိ.

စီဝရသင်္ကမနီယသိက္ခာပဒဝဏ္ဏနာ နိဋ္ဌိတာ.

၆. ဂဏစီဝရသိက္ခာပဒဝဏ္ဏနာ

အညသ္မိံ ပရိက္ခာရေတိ ယတ္ထ ကတ္ထစိ ထာလကာဒီနံ ဝါ သပ္ပိတေလာဒီနံ ဝါ အညတရသ္မိံ. ‘‘သမဂ္ဃကာလေ ဒဿထာ’’တိ ဧဝံ အာနိသံသံ ဒဿေတွာ နိဝါရေန္တိယာတိ ‘‘ကိတ္တကံ အဂ္ဃနကံ ဒါတုကာမတ္ထာ’’တိ ပုစ္ဆိတွာ (ပါစိ. အဋ္ဌ. ၉၀၉) ‘‘ဧတ္တကံ နာမာ’’တိ ဝုတ္တေ ‘‘အာဂမေထ တာဝ၊ ဣဒါနိ ဝတ္ထံ မဟဂ္ဃံ၊ ကတိပါဟေန ကပ္ပါသေ အာဟဋေ သမဂ္ဃံ ဘဝိဿတိ၊ တသ္မိံ ကာလေ ဒဿထာ’’တိ ဧဝံ အာနိသံသံ ဒဿေတွာ နိဝါရေန္တိယာ.

ဂဏစီဝရသိက္ခာပဒဝဏ္ဏနာ နိဋ္ဌိတာ.

၇-၁၀. ပဋိဗာဟနာဒိသိက္ခာပဒဝဏ္ဏနာ

အာနိသံသံ ဒဿေတွာ ပဋိဗာဟန္တိယာတိ ‘‘ဧကိဿာ ဧကံ သာဋကံ နပ္ပဟောတိ၊ အာဂမေထ တာဝ၊ ကတိပါဟေန ဥပ္ပဇ္ဇိဿတိ၊ တတော ဘာဇေဿာမာ’’တိ (ပါစိ. အဋ္ဌ. ၉၁၅) ဧဝံ အာနိသံသံ ဒဿေတွာ ပဋိဗာဟန္တိယာ အနာပတ္တိ.

အဋ္ဌမနဝမာနိ ဥတ္တာနတ္ထာနေဝ.

သေသန္တိ ‘‘ဓမ္မိကေ ဝေမတိကာယာ’’တိအာဒိကံ အဝသေသံ. တတ္ထ အာနိသံသံ ဒဿေတွာ ပဋိဗာဟန္တိယာတိ ‘‘ဘိက္ခုနိသံဃော ဇိဏ္ဏစီဝရော၊ ကထိနာနိသံသမူလကော မဟာလာဘော’’တိ (ပါစိ. အဋ္ဌ. ၉၃၁) ဧဝရူပံ အာနိသံသံ ဒဿေတွာ ပဋိဗာဟန္တိယာ အနာပတ္တိ.

ပဋိဗာဟနာဒိသိက္ခာပဒဝဏ္ဏနာ နိဋ္ဌိတာ.

နဂ္ဂဝဂ္ဂေါ တတိယော.