၈. ပဌမဥစ္စာရဆဍ္ဍနသိက္ခာပဒဝဏ္ဏနာ
တိရောကုဋ္ဋေတိ ဃရကုဋ္ဋဿ ပရဘာဂေ. တိရောပါကာရေတိ ပရိက္ခေပပါကာရဿ တိရောဘာဂေ၊ တေ စ ခေါ ကုဋ္ဋပါကာရာ ဣဋ္ဌကသိလဒါရူနံ ဝသေန တိပ္ပကာရာတိ အာဟ ‘‘ယဿ ကဿစိ ကုဋ္ဋဿ ဝါ ပါကာရဿ ဝါ ပရတော’’တိ. သဗ္ဗာနိပေတာနိ ဧကတော ဆဍ္ဍေန္တိယာတိ ဧတာနိ စတ္တာရိပိ ဝတ္ထူနိ ဧကတော ဆဍ္ဍေန္တိယာ. ပါဋေက္ကံ ပန ဆဍ္ဍေန္တိယာ ဝတ္ထုဂဏနာယ အာပတ္တိယော. အာဏတ္တိယမ္ပိ ဧသေဝ နယော.
ဘိက္ခုဿ ဒုက္ကဋန္တိ ဘိက္ခုဿ သဗ္ဗတ္ထ ဒုက္ကဋံ.
ပဌမဥစ္စာရဆဍ္ဍနသိက္ခာပဒဝဏ္ဏနာ နိဋ္ဌိတာ.