၁. သဉ္စိစ္စသိက္ခာပဒဝဏ္ဏနာ
သပ္ပါဏကဝဂ္ဂဿ ပဌမေ ပါဏောတိ တိရစ္ဆာနဂတပါဏော အဓိပ္ပေတော. တံ ခုဒ္ဒကမ္ပိ မဟန္တမ္ပိ မာရေန္တဿ ပါစိတ္တိယမေဝ၊ မဟန္တေ ပန ဥပက္ကမမဟန္တတာယ အကုသလံ မဟန္တံ ဟောတိ.
သာဝတ္ထိယံ ဥဒါယိတ္ထေရံ အာရဗ္ဘ ပါဏံ ဇီဝိတာ ဝေါရောပနဝတ္ထုသ္မိံ ပညတ္တံ၊ သာဓာရဏပညတ္တိ၊ သာဏတ္တိကံ၊ ပါဏေ ဝေမတိကဿ၊ အပါဏေ ပါဏသညိနော၊ ဝေမတိကဿ ဝါ ဒုက္ကဋံ. အပါဏသညိဿ၊ အသဉ္စိစ္စ၊ အဇာနန္တဿ၊ နမရဏာဓိပ္ပါယဿ၊ ဥမ္မတ္တကာဒီနဉ္စ အနာပတ္တိ. သေသံ မနုဿဝိဂ္ဂဟေ ဝုတ္တနယမေဝါတိ.
သဉ္စိစ္စသိက္ခာပဒဝဏ္ဏနာ နိဋ္ဌိတာ.