၆. ဇောတိသိက္ခာပဒဝဏ္ဏနာ

ဆဋ္ဌေ ဝိသိဗ္ဗနာပေက္ခောတိ တပ္ပိတုကာမော. သမာဒဟေယျာတိ ဇာလေယျ၊ အညတြ တထာရူပပ္ပစ္စယာတိ ပဒီပုဇ္ဇာလနံ ဝါ ပတ္တပစနာဒီသု ဇောတိကရဏံ ဝါတိ ဧဝရူပံ ပစ္စယံ ဝိနာ. တတြာယံ ဝိနိစ္ဆယော – သယံ သမာဒဟန္တဿ အရဏိသဏ္ဌာပနတော ပဋ္ဌာယ ယာဝ ဇာလာ န ဥဋ္ဌဟတိ၊ တာဝ သဗ္ဗပ္ပယောဂေသု ဒုက္ကဋံ၊ ဇာလုဋ္ဌာနေ ပါစိတ္တိယံ. သမာဒဟာပေန္တဿ အာဏတ္တိယာ ဒုက္ကဋံ၊ သကိံ အာဏတ္တေန ဗဟုမ္ပိ သမာဒဟိတေ ဧကမေဝ ပါစိတ္တိယံ.

ဘဂ္ဂေသု သမ္ဗဟုလေ ဘိက္ခူ အာရဗ္ဘ ဇောတိံ သမာဒဟိတွာ ဝိသိဗ္ဗနဝတ္ထုသ္မိံ ပညတ္တံ၊ ‘‘အဂိလာနော၊ အညတြ တထာရူပပ္ပစ္စယာ’’တိ ဣမာနေတ္ထ ဒွေ အနုပညတ္တိယော၊ သာဓာရဏပညတ္တိ၊ သာဏတ္တိကံ၊ တိကပါစိတ္တိယံ၊ ဂိလာနဿ အဂိလာနသညိနော၊ ဝေမတိကဿ ဝါ ဒုက္ကဋံ၊ တထာ ပဋိလာတံ ဥက္ခိပန္တဿ၊ တဉ္စ အဝိဇ္ဈာတံ ဥက္ခိပိတွာ ယထာဌာနေ ဌပေန္တဿ. ဝိဇ္ဈာတံ ပန ဇာလယတော ပါစိတ္တိယမေဝ. ဂိလာနဿ ဂိလာနသညိဿ၊ အညေန ကတံ ဝါ ဝီတစ္စိတင်္ဂါရံ ဝါ ဝိသိဗ္ဗေန္တဿ၊ ပဒီပဇောတိကဇန္တာဃရာဒိကေ တထာရူပပ္ပစ္စယေ၊ အာပဒါသု၊ ဥမ္မတ္တကာဒီနဉ္စ အနာပတ္တိ. အဂိလာနတာ၊ အနုညာတကာရဏာဘာဝေါ၊ ဝိသိဗ္ဗေတုကာမတာ၊ သမာဒဟနန္တိ ဣမာနေတ္ထ စတ္တာရိ အင်္ဂါနိ. သမုဋ္ဌာနာဒီနိ သဉ္စရိတ္တေ ဝုတ္တနယေနေဝ ဝေဒိတဗ္ဗာနီတိ.

ဇောတိသိက္ခာပဒဝဏ္ဏနာ နိဋ္ဌိတာ.