၄. ဥက္ခိတ္တကဩသာရဏသိက္ခာပဒဝဏ္ဏနာ

စတုတ္ထေ ဥက္ခိတ္တန္တိ အာပတ္တိယာ အဒဿနာဒီသု ဥက္ခိတ္တံ. အနညာယ ဂဏဿ ဆန္ဒန္တိ တဿေဝ ကာရကသံဃဿ ဆန္ဒံ အဇာနိတွာ. ဩသာရေယျာတိ ဩသာရဏကမ္မံ ကရေယျ. တဿာ ဧဝံ ကရောန္တိယာ၊ ဂဏပရိယေသနေ သီမာသမ္မုတိယာ ဉတ္တိယာ စ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယံ၊ ကမ္မဝါစာပရိယောသာနေ သံဃာဒိသေသော.

သာဝတ္ထိယံ ထုလ္လနန္ဒံ အာရဗ္ဘ ဧဝံ ဩသာရဏဝတ္ထုသ္မိံ ပညတ္တံ၊ တိကသံဃာဒိသေသံ၊ အဓမ္မကမ္မေ တိကဒုက္ကဋံ၊ ကာရကသံဃံ ဝါ အာပုစ္ဆိတွာ၊ ဂဏဿ ဝါ ဆန္ဒံ ဇာနိတွာ၊ ဝတ္တေ ဝါ ဝတ္တန္တိံ၊ အသန္တေ ကာရကသံဃေ ဩသာရေန္တိယာ၊ ဥမ္မတ္တိကာဒီနဉ္စ အနာပတ္တိ. ဓမ္မကမ္မေန ဥက္ခိတ္တတာ၊ အညတြ အနုညာတကာရဏာ ဩသာရဏန္တိ ဣမာနေတ္ထ ဒွေ အင်္ဂါနိ. သမုဋ္ဌာနာဒီနိ သံဃဘေဒသိက္ခာပဒေ ဝုတ္တနယာနေဝ၊ ဣဒံ ပန ကိရိယာကိရိယန္တိ.

ဥက္ခိတ္တကဩသာရဏသိက္ခာပဒဝဏ္ဏနာ နိဋ္ဌိတာ.