၅. ဘောဇနပ္ပဋိဂ္ဂဟဏပဌမသိက္ခာပဒဝဏ္ဏနာ

ပဉ္စမေ အဝဿုတာတိ ဆန္ဒရာဂေန တိန္တာ. အဝဿုတဿာတိ တာဒိသဿေဝ. ခါဒေယျ ဝါ ဘုဉ္ဇေယျ ဝါတိ ဧတ္ထ ပဋိဂ္ဂဟဏေ ထုလ္လစ္စယံ၊ အဇ္ဈောဟာရေ အဇ္ဈောဟာရေ သံဃာဒိသေသော.

သာဝတ္ထိယံ သုန္ဒရီနန္ဒံ အာရဗ္ဘ အဝဿုတာယ အဝဿုတဿ ဟတ္ထတော အာမိသပ္ပဋိဂ္ဂဟဏဝတ္ထုသ္မိံ ပညတ္တံ၊ ဧကတောအဝဿုတေ ပဋိဂ္ဂဟဏေ ဒုက္ကဋံ၊ အဇ္ဈောဟာရေ အဇ္ဈောဟာရေ ထုလ္လစ္စယံ၊ ယက္ခပေတပဏ္ဍကတိရစ္ဆာနဂတမနုဿဝိဂ္ဂဟာနံ ဟတ္ထတော ဥဘတောအဝဿုတေပိ သတိ ဧသေဝ နယော. တတ္ထ ပန ဧကတောအဝဿုတေ သတိ ဒုက္ကဋံ၊ သဗ္ဗတ္ထ ဥဒကဒန္တပေါနဂ္ဂဟဏေပိ ပရိဘောဂေပိ ဒုက္ကဋမေဝ. ဥဘောသု အနဝဿုတေသု၊ ‘‘အနဝဿုတော’’တိ ဝါ ဉတွာ ဂဏှန္တိယာ၊ ဥမ္မတ္တိကာဒီနဉ္စ အနာပတ္တိ. ဥဒကဒန္တပေါနတော အညံ အဇ္ဈောဟရဏီယံ၊ ဥဘတောအဝဿုတတာ၊ သဟတ္ထာ ဂဟဏံ၊ အဇ္ဈောဟရဏန္တိ ဣမာနေတ္ထ စတ္တာရိ အင်္ဂါနိ. သမုဋ္ဌာနာဒီနိ ပဌမပါရာဇိကသဒိသာနီတိ.

ဘောဇနပ္ပဋိဂ္ဂဟဏပဌမသိက္ခာပဒဝဏ္ဏနာ နိဋ္ဌိတာ.