သမာရောပနဟာရဝဏ္ဏနာ

အာဃာတာဒီနံ အကရဏီယတာဝစနေန ခန္တိသမ္ပဒါ ဒဿိတာ ဟောတိ. ‘‘အပ္ပမတ္တကံ ခေါ ပနေတ’’န္တိအာဒိနာ သောရစ္စသမ္ပဒါ၊ ‘‘အတ္ထိ ဘိက္ခဝေ’’တိအာဒိနာ ဉာဏသမ္ပဒါ၊ ‘‘အပရာမသတော စဿ ပစ္စတ္တညေဝ နိဗ္ဗုတိ ဝိဒိတာ’’တိ၊ ‘‘ဝေဒနာနံ။ပေ။ ယထာဘူတံ ဝိဒိတွာ အနုပါဒါဝိမုတ္တော’’တိ ဧတေဟိ သမာဓိသမ္ပဒါယ သဒ္ဓိံ ဝိဇ္ဇာဝိမုတ္တိဝသီဘာဝသမ္ပဒါ ဒဿိတာ ဟောတိ. တတ္ထ ခန္တိသမ္ပဒါ ပဋိသင်္ခါနဗလသိဒ္ဓိတော သောရစ္စသမ္ပဒါယ ပဒဋ္ဌာနံ. သောရစ္စသမ္ပဒါ ပန အတ္ထတော သီလမေဝ၊ တထာ ပါဏာတိပါတာဒီဟိ ပဋိဝိရတိဝစနံ သီလဿ ပရိယာယဝိဘာဂဒဿနတ္ထံ. တတ္ထ သီလံ သမာဓိဿ ပဒဋ္ဌာနံ၊ သမာဓိ ပညာယ ပဒဋ္ဌာနံ. တေသု သီလေန ဝီတိက္ကမပ္ပဟာနံ ဒုစ္စရိတသံကိလေသပ္ပဟာနဉ္စ သိဇ္ဈတိ၊ သမာဓိနာ ပရိယုဋ္ဌာနပ္ပဟာနံ၊ ဝိက္ခမ္ဘနပ္ပဟာနံ၊ တဏှာသံကိလေသပ္ပဟာနဉ္စ သိဇ္ဈတိ. ပညာယ ဒိဋ္ဌိသံကိလေသပ္ပဟာနံ၊ သမုစ္ဆေဒပ္ပဟာနံ၊ အနုသယပ္ပဟာနဉ္စ သိဇ္ဈတီတိ သီလာဒီဟိ တီဟိ ဓမ္မက္ခန္ဓေဟိ သမထဝိပဿနာဘာဝနာပါရိပူရီ၊ ပဟာနတ္တယသိဒ္ဓိ စာတိ အယံ သမာရောပနော ဟာရော.

သောဠသဟာရဝဏ္ဏနာ နိဋ္ဌိတာ.