သောဓနဟာရဝဏ္ဏနာ

‘‘မမံ ဝါ။ပေ။ ဘာသေယျု’’န္တိ အာရမ္ဘော. ‘‘ဓမ္မဿ။ပေ။ သံဃဿ။ပေ။ ဘာသေယျု’’န္တိ ပဒသုဒ္ဓိ၊ နော အာရမ္ဘသုဒ္ဓိ. ‘‘တတြ တုမှေဟိ။ပေ။ ကရဏီယာ’’တိ ပဒသုဒ္ဓိ စေဝ အာရမ္ဘသုဒ္ဓိ စ. ဒုတိယနယာဒီသုပိ ဧသေဝ နယော. တထာ ‘‘အပ္ပမတ္တကံ ခေါ ပနေတ’’န္တိအာဒိ အာရမ္ဘော. ‘‘ကတမ’’န္တိအာဒိ ပုစ္ဆာ. ‘‘ပါဏာတိပါတံ ပဟာယာ’’တိအာဒိ ပဒသုဒ္ဓိ၊ နော အာရမ္ဘသုဒ္ဓိ၊ နော စ ပုစ္ဆာသုဒ္ဓိ. ‘‘ဣဒံ ခေါ’’တိအာဒိ ပုစ္ဆာသုဒ္ဓိ စေဝ ပဒသုဒ္ဓိ စ အာရမ္ဘသုဒ္ဓိ စ.

တထာ ‘‘အတ္ထိ ဘိက္ခဝေ’’တိအာဒိ အာရမ္ဘော. ‘‘ကတမေ စ တေ’’တိအာဒိ ပုစ္ဆာ. ‘‘သန္တိ ဘိက္ခဝေ’’တိအာဒိ အာရမ္ဘော. ‘‘ကိ’’န္တိအာဒိ အာရမ္ဘ ပုစ္ဆာ. ‘‘ယထာသမာဟိတေ’’တိအာဒိ ပဒသုဒ္ဓိ၊ နော အာရမ္ဘသုဒ္ဓိ နော စ ပုစ္ဆာသုဒ္ဓိ. ‘‘ဣမေ ခေါ တေ’’တိအာဒိ ပဒသုဒ္ဓိ စေဝ ပုစ္ဆာသုဒ္ဓိ စ အာရမ္ဘသုဒ္ဓိ စ. ဣမိနာ နယေန သဗ္ဗတ္ထ အာရမ္ဘာဒယော ဝေဒိတဗ္ဗာတိ. အယံ သောဓနော ဟာရော.