ပညတ္တိဟာရဝဏ္ဏနာ

အာဃာတော ဝတ္ထုဝသေန ဒသဝိဓေန ဧကူနဝီသတိဝိဓေန ဝါ ပညတ္တော. အပ္ပစ္စယော ဥပဝိစာရဝသေန ဆဓာ ပညတ္တော. အာနန္ဒောပီတိအာဒိဝသေန နဝဓာ ပညတ္တော. ပီတိ သာမညတော ခုဒ္ဒိကာဒိဝသေန ပဉ္စဓာ ပညတ္တာ. သောမနဿံ ဥပဝိစာရဝသေန ဆဓာ ပညတ္တံ. သီလံ ဝါရိတ္တစာရိတ္တာဒိဝသေန အနေကဓာ ပညတ္တံ. ဂမ္ဘီရတာဒိဝိသေသယုတ္တံ ဉာဏံ စိတ္တုပ္ပါဒဝသေန စတုဓာ၊ ဒွါဒသဝိဓေန ဝါ၊ ဝိသယဘေဒတော အနေကဓာ စ ပညတ္တံ. ဒိဋ္ဌိသဿတာဒိဝသေန ဒွါသဋ္ဌိယာ ဘေဒေဟိ၊ တဒန္တောဂဓဝိဘာဂေန အနေကဓာ စ ပညတ္တာ. ဝေဒနာ ဆဓာ အဋ္ဌသတဓာ အနေကဓာ စ ပညတ္တာ. တဿာ သမုဒယော ပဉ္စဓာ ပညတ္တော၊ တထာ အတ္ထင်္ဂမော. အဿာဒေါ ဒုဝိဓေန ပညတ္တော. အာဒီနဝေါ တိဝိဓေန ပညတ္တော. နိဿရဏံ ဧကဓာ စတုဓာ စ ပညတ္တံ။ပေ။ အနုပါဒါဝိမုတ္တိ ဒုဝိဓေန ပညတ္တာ.

‘‘အဇာနတံ အပဿတ’’န္တိ ဝုတ္တာ အဝိဇ္ဇာ ဝိသယဘေဒေန စတုဓာ အဋ္ဌဓာ စ ပညတ္တာ. ‘‘တဏှာဂတာန’’န္တိအာဒိနာ ဝုတ္တာ တဏှာ ဆဓာ အဋ္ဌသတဓာ အနေကဓာ စ ပညတ္တာ. ဖဿော နိဿယဝသေန ဆဓာ ပညတ္တော. ဥပါဒါနံ စတုဓာ ပညတ္တံ. ဘဝေါ ဒွိဓာ အနေကဓာ စ ပညတ္တော. ဇာတိ ဝေဝစနဝသေန ဆဓာ ပညတ္တာ. တထာ ဇရာ သတ္တဓာ ပညတ္တာ. မရဏံ အဋ္ဌဓာ နဝဓာ စ ပညတ္တံ. သောကော ပဉ္စဓာ ပညတ္တော. ပရိဒေဝေါ ဆဓာ ပညတ္တော. ဒုက္ခံ စတုဓာ ပညတ္တံ၊ တထာ ဒေါမနဿံ. ဥပါယာသော စတုဓာ ပညတ္တော. ‘‘သမုဒယော ဟောတီ’’တိ ပဘဝပညတ္တိ၊ ‘‘ယထာဘူတံ ပဇာနာတီ’’တိ ဒုက္ခဿ ပရိညာပညတ္တိ၊ သမုဒယဿ ပဟာနပညတ္တိ၊ နိရောဓဿ သစ္ဆိကိရိယာပညတ္တိ၊ မဂ္ဂဿ ဘာဝနာပညတ္တိ.

‘‘အန္တောဇာလီကတာ’’တိအာဒိ သဗ္ဗဒိဋ္ဌီနံ သင်္ဂဟပညတ္တိ. ‘‘ဥစ္ဆိန္နဘဝနေတ္တိကော’’တိအာဒိ ဒုဝိဓေန ပရိနိဗ္ဗာနပညတ္တိ. ဧဝံ အာဃာတာဒီနံ အကုသလကုသလာဒိဓမ္မာနံ ယထာပဘဝပညတ္တိအာဒိဝသေန၊ တထာ ‘‘အာဃာတော’’တိ ဗျာပါဒဿ ဝေဝစနပညတ္တိ၊ ‘‘အပ္ပစ္စယော’’တိ ဒေါမနဿဿ ဝေဝစနပညတ္တီတိအာဒိနာ နယေန ပညတ္တိဘေဒေါ ဝိဘဇိတဗ္ဗောတိ အယံ ပညတ္တိဟာရော.