ပကရဏနယဝဏ္ဏနာ

အယံ ပန ပကရဏနယေန ပါဠိယာ အတ္ထဝဏ္ဏနာ – သာ ပနာယံ အတ္ထဝဏ္ဏနာ ယသ္မာ ဒေသနာယ သမုဋ္ဌာနပ္ပယောဇနဘာဇနေသု ပိဏ္ဍတ္ထေသု စ နိဒ္ဓါရိတေသု သုကရာ ဟောတိ သုဝိညေယျာ စ၊ တသ္မာ သုတ္တဒေသနာယ သမုဋ္ဌာနာဒီနိ ပဌမံ နိဒ္ဓါရယိဿာမ. တတ္ထ သမုဋ္ဌာနံ တာဝ ဝုတ္တံ ‘‘ဝဏ္ဏာဝဏ္ဏဘဏန’’န္တိ. အပိစ နိန္ဒာပသံသာသု ဝိနေယျာဃာတာနန္ဒာဒိဘာဝါနာပတ္တိ၊ တတ္ထ စ အာဒီနဝဒဿနံ သမုဋ္ဌာနံ. တထာ နိန္ဒာပသံသာသု ပဋိပဇ္ဇနက္ကမဿ၊ ပသံသာဝိသယဿ ခုဒ္ဒကာဒိဝသေန အနေကဝိဓဿ သီလဿ၊ သဗ္ဗညုတညာဏဿ သဿတာဒိဒိဋ္ဌိဋ္ဌာနေသု တတုတ္တရိ စ အပ္ပဋိဟတစာရတာယ၊ တထာဂတဿ စ ကတ္ထစိ အပရိယာပန္နတာယ အနဝဗောဓော သမုဋ္ဌာနံ.

ဝုတ္တဝိပရိယာယေန ပယောဇနံ ဝေဒိတဗ္ဗံ. ဝိနေယျာဃာတာနန္ဒာဒိဘာဝါပတ္တိ အာဒိကဉှိ ဣမံ ဒေသနံ ပယောဇေတီတိ. တထာ ကုဟနလပနာဒိနာနာဝိဓမိစ္ဆာဇီဝဝိဒ္ဓံသနံ၊ ဒွါသဋ္ဌိဒိဋ္ဌိဇာလဝိနိဝေဌနံ၊ ဒိဋ္ဌိသီသေန ပစ္စယာကာရဝိဘာဝနံ၊ ဆဖဿာယတနဝသေန စတုသစ္စကမ္မဋ္ဌာနနိဒ္ဒေသော၊ သဗ္ဗဒိဋ္ဌိဂတာနံ အနဝသေသပရိယာဒါနံ၊ အတ္တနော အနုပါဒါပရိနိဗ္ဗာနဒီပနဉ္စ ပယောဇနာနိ.

ဝဏ္ဏာဝဏ္ဏနိမိတ္တံ အနုရောဓဝိရောဓဝန္တစိတ္တာ ကုဟနာဒိဝိဝိဓမိစ္ဆာဇီဝနိရတာ သဿတာဒိဒိဋ္ဌိပင်္ကံ နိမုဂ္ဂါ၊ သီလက္ခန္ဓာဒီသု အပရိပူရကာရိတာယ အနဝဗုဒ္ဓဂုဏဝိသေသဉာဏာ ဝိနေယျာ ဣမိဿာ ဓမ္မဒေသနာယ ဘာဇနံ.

ပိဏ္ဍတ္ထာ ပန အာဃာတာဒီနံ အကရဏီယတာဝစနေန ပဋိညာနုရူပံ သမဏသညာယ နိယောဇနံ၊ ခန္တိသောရစ္စာနုဋ္ဌာနံ၊ ဗြဟ္မဝိဟာရဘာဝနာနုယောဂေါ၊ သဒ္ဓါပညာသမာယောဂေါ၊ သတိသမ္ပဇညာဓိဋ္ဌာနံ၊ ပဋိသင်္ခါနဘာဝနာဗလသိဒ္ဓိ၊ ပရိယုဋ္ဌာနာနုသယပ္ပဟာနံ၊ ဥဘယဟိတပဋိပတ္တိ၊ လောကဓမ္မေဟိ အနုပလေပေါ စ ဒဿိတာ ဟောန္တိ. တထာ ပါဏာတိပါတာဒီဟိ ပဋိဝိရတိဝစနေန သီလဝိသုဒ္ဓိ ဒဿိတာ၊ တာယ စ ဟိရောတ္တပ္ပသမ္ပတ္တိ၊ မေတ္တာကရုဏာသမင်္ဂိတာ၊ ဝီတိက္ကမပ္ပဟာနံ၊ တဒင်္ဂပဟာနံ၊ ဒုစ္စရိတသံကိလေသပ္ပဟာနံ၊ ဝိရတိတ္တယသိဒ္ဓိ၊ ပိယမနာပဂရုဘာဝနီယတာနိပ္ဖတ္တိ၊ လာဘသက္ကာရသိလောကသမုဒါဂမော၊ သမထဝိပဿနာနံ အဓိဋ္ဌာနဘာဝေါ၊ အကုသလမူလတနုကရဏံ၊ ကုသလမူလရောပနံ၊ ဥဘယာနတ္ထဒူရီကရဏံ၊ ပရိသာသု ဝိသာရဒတာ၊ အပ္ပမာဒဝိဟာရော၊ပရေဟိ ဒုပ္ပဓံသိယတာ၊ အဝိပ္ပဋိသာရာဒိသမင်္ဂိတာ စ ဒဿိတာ ဟောန္တိ.

‘‘ဂမ္ဘီရာ’’တိအာဒိဝစနေဟိ ဂမ္ဘီရဓမ္မဝိဘာဝနံ၊ အလဗ္ဘနေယျပတိဋ္ဌတာ၊ ကပ္ပါနံ အသင်္ချေယျေနာပိ ဒုလ္လဘပါတုဘာဝတာ၊ သုခုမေနပိ ဉာဏေန ပစ္စက္ခတော ပဋိဝိဇ္ဈိတုံ အသက္ကုဏေယျတာ၊ ဓမ္မနွယသင်္ခါတေန အနုမာနဉာဏေနာပိ ဒုရဓိဂမနီယတာ၊ ပဿဒ္ဓသဗ္ဗဒရထတာ၊ သန္တဓမ္မဝိဘာဝနံ၊ သောဘနပရိယောသာနတာ၊ အတိတ္တိကရဘာဝေါ၊ ပဓာနဘာဝပ္ပတ္တိ၊ ယထာဘူတဉာဏဂေါစရတာ၊ သုခုမသဘာဝတာ၊ မဟာပညာဝိဘာဝနာ စ ဒဿိတာ ဟောန္တိ. ဒိဋ္ဌိဒီပကပဒေဟိ သမာသတော သဿတုစ္ဆေဒဒိဋ္ဌိယော ပကာသိတာတိ ဩလီနတာတိဓာဝနဝိဘာဝနံ၊ ဥပါယဝိနိဗဒ္ဓနိဒ္ဒေသော၊ မိစ္ဆာဘိနိဝေသကိတ္တနံ၊ ကုမ္မဂ္ဂပဋိပတ္တိယာ ပကာသနာ၊ ဝိပရိယေသဂ္ဂါဟပညာပနံ၊ ပရာမာသပရိဂ္ဂဟော၊ ပုဗ္ဗန္တာပရန္တာနုဒိဋ္ဌိပတိဋ္ဌာပနံ၊ ဘဝဝိဘဝဒိဋ္ဌိဝိဘာဂေါ၊ တဏှာဝိဇ္ဇာပဝတ္တိ၊ အန္တဝါနန္တဝါဒိဋ္ဌိနိဒ္ဒေသော၊ အန္တဒွယာဝတာရဏံ၊ အာသဝေါဃယောဂကိလေသဂန္ထသံယောဇနူပါဒါနဝိသေသဝိဘဇ္ဇနဉ္စ ဒဿိတာနိ ဟောန္တိ. တထာ ‘‘ဝေဒနာနံ သမုဒယ’’န္တိအာဒိဝစနေဟိ စတုန္နံ အရိယသစ္စာနံ အနုဗောဓပဋိဝေဓသိဒ္ဓိ၊ ဝိက္ခမ္ဘနသမုစ္ဆေဒပ္ပဟာနံ၊ တဏှာဝိဇ္ဇာဝိဂမော၊ သဒ္ဓမ္မဋ္ဌိတိနိမိတ္တပရိဂ္ဂဟော၊ အာဂမာဓိဂမသမ္ပတ္တိ၊ ဥဘယဟိတပဋိပတ္တိ၊ တိဝိဓပညာပရိဂ္ဂဟော၊ သတိသမ္ပဇညာနုဋ္ဌာနံ၊ သဒ္ဓါပညာသမာယောဂေါ၊ သမ္မာဝီရိယသမထာနုယောဇနံ၊ သမထဝိပဿနာနိပ္ဖတ္တိ စ ဒဿိတာ ဟောန္တိ.

‘‘အဇာနတံ အပဿတ’’န္တိ အဝိဇ္ဇာသိဒ္ဓိ၊ ‘‘တဏှာဂတာနံ ပရိတဿိတဝိပ္ဖန္ဒိတန္တိ တဏှာသိဒ္ဓိ၊ တဒုဘယေန စ နီဝရဏသံယောဇနဒွယသိဒ္ဓိ၊ အနမတဂ္ဂသံသာရဝဋ္ဋာနုစ္ဆေဒေါ၊ ပုဗ္ဗန္တာဟရဏအပရန္တပဋိသန္ဓာနာနိ၊ အတီတပစ္စုပ္ပန္နကာလဝသေန ဟေတုဝိဘာဂေါ၊ အဝိဇ္ဇာတဏှာနံ အညမညာနတိဝတ္တနဋ္ဌေန အညမညူပကာရိတာ၊ ပညာဝိမုတ္တိစေတောဝိမုတ္တီနံ ပဋိပက္ခနိဒ္ဒေသော စ ဒဿိတာ ဟောန္တိ. ‘‘တဒပိ ဖဿပစ္စယာ’’တိ သဿတာဒိပညာပနဿ ပစ္စယာဓီနဝုတ္တိတာကထနေန ဓမ္မာနံ နိစ္စတာပဋိသေဓော၊ အနိစ္စတာပတိဋ္ဌာပနံ၊ ပရမတ္ထတော ကာရကာဒိပဋိက္ခေပေါ၊ ဧဝံဓမ္မတာဒိနိဒ္ဒေသော၊ သုညတာပကာသနံ၊ သမတ္တနိယာမပစ္စယလက္ခဏဝိဘာဝနဉ္စ ဒဿိတာနိ ဟောန္တိ.

‘‘ဥစ္ဆိန္နဘဝနေတ္တိကော’’တိအာဒိနာ ဘဂဝတော ပဟာနသမ္ပတ္တိ၊ ဝိဇ္ဇာဓိမုတ္တိ၊ ဝသီဘာဝေါ၊ သိက္ခတ္တယနိပ္ဖတ္တိ၊ နိဗ္ဗာနဓာတုဒွယဝိဘာဂေါ၊ စတုရဓိဋ္ဌာနပရိပူရဏံ၊ ဘဝယောနိအာဒီသု အပရိယာပန္နတာ စ ဒဿိတာ ဟောန္တိ. သကလေန ပန သုတ္တပဒေန ဣဋ္ဌာနိဋ္ဌေသု ဘဂဝတော တာဒိဘာဝေါ၊ တတ္ထ စ ပရေသံ ပတိဋ္ဌာပနံ၊ ကုသလဓမ္မာနံ အာဒိဘူတဓမ္မဒွယဿ နိဒ္ဒေသော၊ သိက္ခတ္တယူပဒေသော၊ အတ္တန္တပါဒိပုဂ္ဂလစတုက္ကသိဒ္ဓိ၊ ကဏှာကဏှဝိပါကာဒိကမ္မစတုက္ကဝိဘာဂေါ၊ စတုရပ္ပမညာဝိသယနိဒ္ဒေသော၊ သမုဒယာဒိပဉ္စကဿ ယထာဘူတာဝဗောဓော၊ ဆသာရဏီယဓမ္မဝိဘာဝနာ၊ ဒသနာထကရဓမ္မပတိဋ္ဌာပန္တိ ဧဝမာဒယော နိဒ္ဓါရေတဗ္ဗာ.