၅. ပဉ္စကနိဒ္ဒေသဝဏ္ဏနာ

၈၀၄. တမေဝ ပညံ ‘‘ဒွီသု ဈာနေသု ပညာ ပီတိဖရဏေနာ’’တိအာဒိနာ ဝိဘဇတိ. အဘိသန္ဒနပရိသန္ဒနပရိပူရဏာနိပိ ပရိပ္ဖရဏံ ဝိယ ဖရဏာပီတိယာ၊ တံသဟဂတသုခဿ စ ကိစ္စဝိသေသဘူတာနိ အဓိပ္ပေတာနီတိ အာဟ ‘‘အဘိသန္ဒေတီတိ။ပေ။ ဝေဒိတဗ္ဗ’’န္တိ. အာဒိနာ နယေနာတိ ‘‘အဘိသန္ဒေတီ’’တိအာဒိနာ (ဒီ. နိ. ၁.၂၂၆၊ မ. နိ. ၁.၄၂၇) သုတ္တေ အာဂတနယေန. ဖရဏဉ္စေတ္ထ ပီတိသုခသမုဋ္ဌိတပဏီတရူပေဟိ ကာယဿ အဘိဗျာပနံ ဒဋ္ဌဗ္ဗံ. အာရမ္မဏေတိ ပီတိဖရဏတာသုခဖရဏတာသီသေန ဝုတ္တာနံ တိကဒုကဈာနာနံ အာရမ္မဏေ. တာတိ ပီတိဖရဏတာသုခဖရဏတာ.

သမာဓိမုခေနာတိ သမာဓိံ မုခံ ပမုခံ ကတွာ၊ သမာဓိသီသေနာတိ အတ္ထော၊ သမာဓိပမုခေန ဝါ ဥဒ္ဒေသနိဒ္ဒေသေန. အညေ ကိလေသာ ဒိဋ္ဌိမာနာဒယော. အပ္ပယောဂေနာတိ ဈာနဝိမောက္ခာဒီနံ ဝိယ ဥပ္ပါဒနီယပရိကမ္မပယောဂေန ဝိနာ. အာဝဇ္ဇနာသဒိသော ဟိ ဖလသမာပတ္တိအတ္ထော သမ္မသနစာရော. ဌပိတတ္တာတိ ပဝတ္တိတတ္တာ. သတိဗဟုလတာယာတိ သတိယာ အဘိဏှုပ္ပတ္တိယာ. ပရိစ္ဆိန္ဒနသတိယာ ကာလဿ သတောတိ ဒဿေတီတိ ယောဇနာ.

ပဉ္စကနိဒ္ဒေသဝဏ္ဏနာ နိဋ္ဌိတာ.