၁. သံယောဇနသုတ္တဝဏ္ဏနာ

၁၃၁. စတုတ္ထဿ ပဌမေ ဥပပတ္တိပ္ပဋိလာဘံ သံဝတ္တနိကာနီတိ ဥပပတ္တိပဋိလာဘိယာနိ. ဘဝပဋိလာဘိယာနီတိ ဧတ္ထာပိ ဧသေဝ နယော. ယေဟီတိ ယေဟိ သံယောဇနေဟိ ဟေတုဘူတေဟိ၊ ကရဏဘူတေဟိ ဝါ. နနု စ သောတာပန္နဿပိ ဩရမ္ဘာဂိယာနိ သံယောဇနာနိ အပ္ပဟီနာနိ၊ ကသ္မာ ပန သကဒါဂါမီယေဝ ဣဓ ဂဟိတောတိ အာဟ ‘‘သကဒါဂါမိဿာတိ ဣဒံ အပ္ပဟီနသံယောဇနေသု အရိယေသု ဥတ္တမကောဋိယာ ဂဟိတ’’န္တိ. တတ္ထ အပ္ပဟီနသံယောဇနေသူတိ အပ္ပဟီနဩရမ္ဘာဂိယသံယောဇနေသု. ဥတ္တမကောဋိယာ ဂဟိတန္တိ ဥက္ကဋ္ဌပရိစ္ဆေဒေန ဂဟိတံ. သကဒါဂါမိတော ပရဉှိ အပ္ပဟီနဩရမ္ဘာဂိယသံယောဇနော အရိယော နာမ နတ္ထိ. နနု စ သကဒါဂါမိဿ ပဟီနာနိပိ ဩရမ္ဘာဂိယာနိ သံယောဇနာနိ အတ္ထိ ဒိဋ္ဌိဝိစိကိစ္ဆာသီလဗ္ဗတပရာမာသသံယောဇနာနံ ပဟီနတ္တာ၊ တသ္မာ ‘‘ဩရမ္ဘာဂိယာနိ သံယောဇနာနိ အပ္ပဟီနာနီ’’တိ ကသ္မာ ဝုတ္တန္တိ အာဟ ‘‘ဩရမ္ဘာဂိယေသု စ အပ္ပဟီနံ ဥပါဒါယာ’’တိအာဒိ. ယသ္မာ ကာမရာဂဗျာပါဒသံယောဇနာနိ သကဒါဂါမိဿ အပ္ပဟီနာနိ၊ တသ္မာ တာနိ အပ္ပဟီနာနိ ဥပါဒါယ ‘‘ဩရမ္ဘာဂိယာနိ သံယောဇနာနိ အပ္ပဟီနာနီ’’တိ ဝုတ္တံ၊ န သဗ္ဗေသံ အပ္ပဟီနတ္တာတိ အဓိပ္ပါယော.

သံယောဇနသုတ္တဝဏ္ဏနာ နိဋ္ဌိတာ.